آرمی چیف سے دو بار بات ہوئی، مگر جو کہنا تھا اس کا ماحول نہیں تھا، علی امین گنڈاپور

وزیراعلیٰ خیبر پختونخوا علی امین گنڈاپور نے کہا ہے کہ عمران خان نے ہمیشہ کہا ہے کہ وہ پاکستان کی خاطر مذاکرات کرنے کے لیے تیار ہیں، آج ایس آئی ایف سی اجلاس میں آرمی چیف سے دو بار بات چیت ہوئی مگر جو بات کرنی ہے اس کا ماحول نہیں تھا۔

اسلام آباد میں میڈیا سے گفتگو کرتے ہوئے علی امین گنڈاپور نے کہاکہ عمران خان ہماری اولین ترجیح ہیں، اور ان کے معاملے پر بات ایک الگ لیول پر شروع ہے۔

انہوں نے کہاکہ صوبے کے شیئرز پر سمجھوتہ نہیں کروں گا، میں اپنے لوگوں کو ریلیف دینے کے لیے ہر حد تک جاؤں گا۔

علی امین گنڈاپور نے کہاکہ کان کنی میں اصلاحات کرکے ریونیو بڑھا سکتے ہیں، میں نے ایس آئی ایف سی کے اجلاس میں فاٹا اور پاٹا پر ٹیکس لگانے کی مخالفت کی ہے۔

انہوں نے کہاکہ ہمیں واجبات کی ادائیگی کی جارہی ہے نہ ایڈجسٹ کیے جارہے ہیں، جو زیادتی ہے۔ میں نے اجلاس میں اپنے صوبے کے تحفظات سے آگاہ کیا ہے۔

ایک سوال کے جواب میں علی امین گنڈاپور نے کہاکہ پنجاب حکومت کا رویہ جمہوری نہیں ہے۔

وزیراعلیٰ خیبرپختونخوا نے کہاکہ ہم نے وفاق سے قبل صوبے کا بجٹ پیش کرکے کوئی غیر آئینی اقدام نہیں کیا۔

واضح رہے کہ وزیراعلیٰ خیبرپختونخوا علی امین گنڈاپور نے آج ایس آئی ایف سی کے اجلاس میں شرکت کی ہے۔