آئی سی سی مینز ٹی20 کرکٹ ورلڈ کپ 2024 کے 18ویں میچ میں ویسٹ انڈیز نے یوگنڈا کو 134 رنز کے بڑے مارجن سے شکست دی ہے۔
گیانا میں کھیلے جارہے گروپ سی کے 18ویں میچ میں ویسٹ انڈیز کے کپتان رومان پاؤل نے ٹاس جیت کر پہلے بیٹنگ کرنے کا فیصلہ کیا۔ ویسٹ انڈیز نے مقررہ 20 اوورز میں 5 وکٹوں کے نقصان پر 173 رنز بنائے۔ جانسن چارلس 44 رنز کے ساتھ نمایاں رہے۔ برینڈن کنگ 13، نکولس پورن 22، رومان پاؤل 23 اور رتھر فورڈ 22 جبکہ آندرے رسل 17 گیندوں پر 30 رنز بناکر ناقابل شکست رہے۔
مزید پڑھیں
یوگنڈا کی جانب سے مسابا نے 2، رام جانی، کوسماس اور نکرانی نے ایک ایک وکٹ لی۔
یوگنڈا نے 174 رنز کے تعاقب میں خراب کارکردگی کا مظاہرہ کیا۔ ان کی وکٹیں بالترتیب صفر رنز، 8، 15، 15، 19، 22، 23، 25، 34 اور 39 رنز پر گری۔ صرف ایک کھلاڑی جمامیاگی 2 ہندسوں میں جاسکا، جس نے 13 رنز ناٹ آؤٹ کی اننگز کھیلی۔
ویسٹ انڈیز کی جانب سے عقیل حسین نے 4 اوورز میں 11 رنز کے عوض 5 کھلاڑیوں کو پویلین کی راہ دکھائی۔ شاندار کارکردگی پر انہیں مین آف دی میچ کا ایوارڈ دیا گیا۔
