سعودی عرب کی وزارت صحت نے عازمین حج کو مقدس مقامات پر گرمی کی صورتحال سے آگاہ کرتے ہوئے بتایا ہے کہ کچھ پہاڑی علاقوں میں درجہ حرارت 72 ڈگری سینٹی گریڈ تک بھی پہنچ سکتا ہے۔
مزید پڑھیں
وزارت صحت نے عازمین حج کو طویل عرصے تک دھوپ میں رہنے کے خطرات سے آگاہ کرتے ہوئے بتایا کہ حج 1445 ہجری کے دوران مکہ مکرمہ میں شدید گرمی کی وجہ سے یہ سب سے بڑا چیلنج ہے جس کا حجاج کو سامنا ہوگا۔
وزارت نے عازمین حج سے مستقل طور پر چھتریاں استعمال کرنے کی اپیل کی ہے تاکہ وہ براہ راست دھوپ سے بچ سکیں اور پورے دن میں پیاس نہ لگنے کی صورت میں بھی کافی مقدار میں پانی پینے کی تلقین کی ہے۔
وزارت صحت نے مزید بتایا کہ حجاج صحت سے متعلق ہدایات اور مشوروں پر عمل کریں اور صبح 11 بجے سے دوپہر 3 بجے تک کے درمیانی وقت میں باہر نکلنے اور دھوپ میں چلنے یا سطحوں کو چھونے سے گریز کریں۔
وزارت صحت کی جانب سے یہ اقدامات حجاج کی صحت اور سلامتی کو یقینی بنانے کے لیے کیے گئے ہیں تاکہ وہ حج کے فرائض کو بہتر طریقے سے ادا کر سکیں۔
