مصرکے المنیا گورنریٹ میں پیش آنے والے ایک حادثے میں شادی کی خوشی اچانک ماتم میں بدل گئی، جب اپنی ہی شادی کی تقریب میں سفید عروسی لباس پہنے بیٹھی دلہن اچانک حرکت قلب بند ہونے سے انتقال کرگئی۔
مزید پڑھیں
عرب میڈیا کے مطابق المنیا گورنریٹ میں واقع بنی مزار سینٹر کے ایک چرچ میں 20 سالہ دلہن کی شادی کی تقریب چل رہی تھی جس دوران دلہن کو شدید تکلیف محسوس ہوئی تاہم شادی کی تقریب کی وجہ سے اہل خانہ اسپتال لے جانے پر تاخیر کا شکار رہے۔
رپورٹ کے مطابق جب نینسی نامی دلہن کو اسپتال لے جایا گیا تو وہاں حرکت قلب بند ہونے سے دم توڑ گئی۔ معائنے پر پتہ چلا کہ لڑکی کی عمر بیس سال تھی اور تقریب کے دوران اچانک دل کا دورہ پڑا جس نے اس کی جان لے لی۔
تاہم، اس واقعے میں کسی مجرمانہ سازش کا ثبوت نہیں ملا اور موت کو حادثاتی قرار دیا گیا۔ بعد ازاں اسپتال انتظامیہ نے لاش کو دفن کرنے کے لیے اس کے لواحقین کے حوالے کردی۔
لاش گھر پہنچتے ہی دونوں خاندانوں میں صف ماتم بچھ گئی، دلہن کی موت کے بعد شادی کی خوشی ماتم میں بدل گئی۔
