صدر مملکت آصف علی زرداری نے منشیات کے استعمال اور اسمگلنگ کے خلاف عالمی دن کے موقعے پر ایک خصوصی پیغام جاری کیا ہے۔
مزید پڑھیں
اپنے پیغام میں انہوں نے کہا کہ آج ہم منشیات کے استعمال اور اسمگلنگ کے خلاف عالمی دن منا رہے ہیں جو پاکستان میں انسدادِ منشیات اور اسمگلنگ کے خاتمے کے لیے ٹھوس اقدامات کو اجاگر کرتا ہے۔
صدر مملکت نے کہا کہ منشیات کی پیداوار اور اسمگلنگ نہ صرف ہماری نوجوان نسل اور ان کے خاندانوں کے لیے نقصان دہ ہے بلکہ یہ جرائم پیشہ اور دہشت گرد عناصر کے لیے آمدن کا بھی ذریعہ ہے۔ منشیات کے استعمال کی بنیادی وجوہات سے نمٹنے کے لیے قانون نافذ کرنے والے اداروں، میڈیا، سول سوسائٹی، والدین اور اساتذہ سمیت تمام اسٹیک ہولڈرز کی مدد سے ایک جامع حکمت ِعملی اپنانے کی ضرورت ہے۔
انہوں نے کہا کہ ہمیں منشیات سپلائی کرنے اور بیچنے والوں کے خلاف کارروائی کرکے اپنے معاشرے بالخصوص تعلیمی اداروں میں منشیات کی ترسیل کو روکنا ہوگا۔ انہوں نے مزید کہا کہ قانون نافذ کرنے والے اداروں کو چاہیے کہ وہ فعال اقدامات کریں اور منشیات کی اسمگلنگ میں ملوث افراد کے خلاف سخت کارروائیاں کریں۔
صدر مملکت نے کہا کہ منشیات کی لعنت کے خاتمے کے لیے آگاہی، مؤثر انسداد منشیات قوانین، روک تھام اور علاج پر سرمایہ کاری اور کمیونٹیز کو ساتھ لیکر چلنا بھی انتہائی اہم ہے۔ انہوں نے مزید کہا کہ ہمیں اپنی نوجوان نسل کو منشیات کی لعنت سے بچانے کے لیے منشیات کے مضر اثرات کے حوالے سے تعلیم دینی ہوگی اور نوجوانوں کی توانائیوں کو صحت مند اور پیداواری سرگرمیوں کی جانب موڑنا ہوگا۔
انہوں نے کہا کہ ہماری نوجوان نسل کا مستقبل ہمارے ہاتھ میں ہے اور آج کے دن میں ہر شہری کو پیغام دیتا ہوں کہ وہ معاشرے سے منشیات کے خاتمے کے لیے جنگ میں حکومت کا ساتھ دے۔
صدر مملکت نے شہریوں سے درخواست کی کہ منشیات کے مضر اثرات کے بارے میں انفرادی، خاندانی اور کمیونٹی کی سطح پر آگاہی پیدا کریں، روک تھام اور علاج کو ترجیح دیں۔
انہوں نے کہا کہ انہیں یقین ہے کہ ہم سب مل کر پاکستان کو منشیات سے پاک ملک بنا سکتے ہیں۔
