سوشل میڈیا گلوکار چاہت فتح علی خان قانونی مشکلات میں گھر چکے ہیں کیوں کہ انہیں اب مختلف خلاف ورزیوں پر 18 کروڑ روپے کے ہرجانے کا سامنا ہے۔
فیصل آباد کے مقامی گلوکار قیصر منیر نے چاہت فتح علی خان کو 18 کروڑ روپے ہرجانے کا نوٹس بھیج دیا ہے۔
مزید پڑھیں: چاہت فتح علی خان کا گانا ’بدوبدی‘ یوٹیوب سے ایک بار پھر ڈیلیٹ کیوں ہوا؟
برطانیہ میں چاہت کی رہائش گاہ پر بھیجے گئے نوٹس میں ان پر پاکستان کے لیجنڈ گلوکار نصرت فتح علی خان مرحوم کے نام کو بدنام کرنے، فیصل آباد کے لوگوں کو ناراض کرنے اور کاپی رائٹ ایکٹ کی خلاف ورزی کے الزامات عائد کیے گئے ہیں۔
نوٹس میں خاص طور پر دعویٰ کیا گیا ہے کہ چاہت نے اپنے نام کے ساتھ فتح علی خان لگا کر خود کو نصرت فتح علی کا رشتے دار ہونے کا تاثر دیا ہے اور اپنے گانے کے متنازع انداز سے لیجنڈ گلوکار کی میراث کو خاصا نقصان پہنچایا ہے۔ ان پر بغیر اجازت کے نصرت کا نام اور انداز استعمال کرکے کاپی رائٹ ایکٹ کی خلاف ورزی کا الزام لگایا گیا ہے۔ یاد رہے کہ چاہت فتح علی خان کے نام سے مشہور ان گلوکار کا اصل نام کاشف رانا ہے۔
یہ بھی پڑھیے: چاہت فتح علی کے ساتھ ویڈیو بنوانا زندگی کی سب سے بڑی غلطی تھی، ماڈل وجدان راؤ
علاوہ ازیں نوٹس میں یہ بھی کہا گیا ہے کہ چاہت کی پرفارمنس پر نصرت فتح علی خان کے مداحوں میں بڑے پیمانے پر غم و غصہ پایا جاتا ہے۔
قانونی نوٹس میں چاہت سے سوشل میڈیا پر عوامی معافی مانگنے کا مطالبہ کیا گیا ہے۔ ان کو خبردار کیا گیا ہے کہ اگر وہ 15 دنوں کے اندر جواب دینے میں ناکام رہے تو عدالت میں ہتک عزت کا مقدمہ دائر کیا جائے گا۔
