وفاقی وزیر داخلہ محسن نقوی نے اسلام آباد کو عالمی معیار کا شہر بنانے کے لیے اہم فیصلے کرتے ہوئے سی ڈی اے پر موٹر سائیکلز خریدنے پر پابندی عائد کردی۔
جمعے کے روز وفاقی وزیر داخلہ محسن نقوی نے کیپیٹل ڈیویلپمنٹ اتھارٹی (سی ڈی اے) میں ایک اہم اجلاس کی صدارت کی،جس میں اسلام آباد کو عالمی معیار کا شہر بنانے کے لیے اہم فیصلے کیے گئے ہیں۔
سی ڈی اے پر پیٹرول موٹر سائیکلز خریدنے پر پابندی عائد
وزیر داخلہ کی ہدایت پر ماحولیاتی آلودگی میں کمی لانے کے لیے سی ڈی اے آئندہ سے صرف الیکٹرک بائیکس خریدے گی، اسلام آباد کے شہریوں کے لیے ماحول دوست الیکٹرک بسیں چلائی جائیں گی، پیٹرول موٹر سائیکلز خریدنے پر پابندی عائد کردی گئی۔
ایمرجنسی سروسز کو میٹرو پولیٹن کارپوریشن سے سی ڈی اے کو منتقل کرنے کا فیصلہ
اجلاس میں فیصلہ کیا گیا کہ اسلام آباد کے شہریوں کو انٹرنیشنل سٹینڈرڈ کی ایمرجنسی سروسز فراہم کی جائیں گی، ایمرجنسی سروسز کو میٹرو پولیٹن کارپوریشن اسلام آباد (ایم سی آئی) سے سی ڈی اے کو منتقل کرنے کا فیصلہ کیا گیا، کیپٹل واسا کا قیام بھی جلد عمل میں لایا جائے گا۔
وفاقی وزیرداخلہ محسن نقوی کےاسلام آباد کو عالمی معیار کا شہر بنانے کے لئے اہم فیصلے
ماحولیاتی آلودگی میں کمی کے لئے سی ڈی اے آئندہ سے صرف الیکٹرک بائیکس خریدے گی
اسلام آباد کے شہریوں کے لئے ماحول دوست الیکٹرک بسیں چلائی جائیں گی pic.twitter.com/1G2tEySJiI— Ministry of Interior GoP (@MOIofficialGoP) July 5, 2024
اجلاس میں یہ بھی فیصلہ کیا گیا کہ کیپیٹل ویسٹ مینجمنٹ کمپنی کے قیام کے لیے متعلقہ امور کو جلد حتمی شکل دی جائے گی۔
سرینا چوک انڈر پاس اور ایف نائن پارک چوک فلائی اوور پر کام تیز کیا جائے
اس موقع پر وفاقی وزیر داخلہ محسن نقوی نے گفتگو میں کہا کہ اسلام آباد میں ٹریفک کے مسائل کو کم کرنے کے لیے سرینا چوک انڈر پاس اور ایف نائن پارک چوک فلائی اوور منصوبوں پر تعمیراتی کام جلد شروع کر دیا جائے گا، طویل مدت سے زیر التوا ایکسپریس وے کے منصوبے کو مکمل کرنے کے لیے کام کی رفتار تیز کی جائے گی۔
انہوں نے کہا کہ اسلام اباد کے کئی برس سے نان ڈیویلپ سکیٹرز میں ترقیاتی کاموں کو مکمل کرکے لوگوں کو قبضہ دیا جائے گا، 17 برس سے تعطل کا شکار اسلام آباد ماڈل جیل پر کام تیزی سے جاری ہے، پہلے مرحلہ کو مقررہ مدت میں مکمل کیا جائے گا۔
سرمایہ کاروں کو ایک چھت تلے سہولیات
وزیر داخلہ نے کہا کہ اسلام آباد میں بزنس فیسلیٹشن سنٹر بنائے جارہے ہیں، جہاں سرمایہ کاروں کو سہولیات ایک چھت تلے فراہم کی جائیں گی، سیکٹر ایچ سولہ میں ہیلتھ ٹاور کیلیے زمین کی الاٹمنٹ کر دی گئی ہے۔
ریکارڈ ٹیکس وصولی پر سی ڈی اے کو مبارکباد اور تنبیہہ
وزیر داخلہ نے ریکارڈ ٹیکس وصولی پر چیئرمین سی ڈی اے سمیت پوری ٹیم کو مبارکباد دی، لیکن ساتھ یہ بھی تنبیہہ کی کہ صرف پلاٹ اور زمیں بیچ کر کوئی ادارہ نہیں چل سکتا، ضروری ہے کہ ادارے کے اثاثے بڑھائے جائیں، اس سلسلے میں وزیر داخلہ نے ہدایت کی کہ انوسمنٹ پلان مرتب کرکے 7 روز میں پیش کیا جائے گا۔
ترقیاتی منصوبوں پر پیشرفت کا تفصیلی جائزہ
اجلاس میں اسلام آباد میں جاری ترقیاتی منصوبوں پر پیشرفت کا تفصیلی جائزہ بھی لیا گیا، جس میں کری انکلیو، فیڈرل سیکریٹریٹ کی عمارت کی تزئین و آرائش، ڈپلومیٹک انکلیو اور اسمارٹ پارکنگ کے منصوبوں پر پیشرفت پر بھی غور کیا گیا۔
اجلاس میں چیئرمین سی ڈی اے محمد علی رندھاوا، ڈپٹی کمشنر اسلام آباد عرفان میمن اور سی ڈی اے کے تمام ممبران نے شرکت کی،چیئرمین سی ڈی اے محمد علی رندھاوا نے وفاقی وزیر داخلہ کو مختلف منصوبوں پر تفصیلی بریفننگ دی۔
