ہندوستانی نژاد امریکی اداکارہ پریانکا چوپڑا نے کہا ہے کہ بالی ووڈ میں رنگت کے حوالے سے تعصب عام ہے۔
غیر ملکی میڈیا رپورٹس کے مطابق پریانکا چوپڑا کا کہنا ہے کہ انہیں ان کی رنگت کی وجہ سے اس قسم کا کام نہیں مل رہا تھا جس طرح وہ چاہتی تھیں جس کے باعث انہیں بالی ووڈ کو خیرباد کہنا پڑا۔
اداکارہ نے کہا کہ انہیں بہت سی فلموں میں غیر سنجدیدگی سے لیا جاتا ہے۔ انہوں نے اپنے ماضی کے حوالے سے ذکر کرتے ہوئے کہا کہ انہیں نے بہت سے فیئرنس اشتہارات میں کام کیا جس کا انہیں نقصان ہوا۔
ان کا کہنا ہے کہ بالی ووڈ میں آج بھی کچھ لوگوں سے ان کے تعلقات خراب ہیں۔
پریانکا چوپڑا آج کل بالی ووڈ چھوڑنے اور کام کرنے کے لیے امریکہ جانے کی اصل وجوہات بتانے پر سرخیوں کی زینت بنی ہوئی ہیں۔
میڈیا رپورٹس کے مطابق اداکارہ کے اس بیان کے بعد ان کی کزن میرا چوپڑا بھی ان کی حمایت میں بول پڑی ہیں۔
میرا چوپڑا کا کہنا ہے کہ پریانکا چوپڑا کو دبایا گیا مگر اپنی محنت سے جو مقام آج انہوں نے حاصل کیا وہ ان تمام لوگوں کے منہ پر ایک تمانچہ ہے۔
دوسری جانب پریانکا چوپڑا ان دنوں اپنی نئی ویب سیریز ‘سیٹاڈل’ کی ریلیز کے لیے تیاری کر رہی ہیں۔
