پاکستان تحریک انصاف (پی ٹی آئی) کے چیئرمین بیرسٹر گوہر خان نے دعویٰ کیا ہے کہ پی ٹی آئی کے مظفر گڑھ کے حلقے سے رکن قومی اسمبلی معظم جتوئی کو اغوا کرلیا گیا ہے۔
سماجی رابطے کے پلیٹ فارم ’ایکس‘ پر اپنی ایک پوسٹ میں انہوں نے کہا، ’ سپریم کورٹ کے احکامات ہیں کہ کسی کو نہیں اٹھایا جائے گا لیکن اس کے باوجود ناقابل تصور کارروائیاں جاری ہیں۔
یہ بھی پڑھیں: پی ٹی آئی سوشل میڈیا ہیڈ اظہر مشوانی کا سی ٹی ڈی پر بھائیوں کو اغوا کرنے کا الزام
بیرسٹر گوہر نے کہا کہ معظم جتوئی کو آج صبح مظفر گڑھ میں ان کے گھر سے اغوا کیا گیا باوجود اس کے کہ وہ پہلے ہی سپریم کورٹ کی روشنی میں تحریک انصاف میں شمولیت سے متعلق اپنا بیان حلفی جمع کرا چکے ہیں۔
انہوں نے کہا کہ ہم ایسی کارروائیوں کی شدید مذمت کرتے ہیں اور ان کی فوری رہائی کا مطالبہ کرتے ہیں۔
The unthinkable continues despite SC order that “no one will be picked up”. Our MNA from Muzaffargarh Moazam Jatoi was abducted early this morning from his house although he has submitted his statement/affidavit as directed by SCt. We strongly condemn such actions and demand his…
— Barrister Gohar Khan (@BarristerGohar) July 17, 2024
چیئرمین پی ٹی آئی نے مزید کہا کہ ہم اغوا کی تمام کارروائیوں کے بارے میں عدالت کو آگاہ کریں گے اور امید رکھتے ہیں کہ عدالت اس پر کارروائی کرے گی۔
قبل ازیں، مظفر گڑھ میں پی ٹی آئی کے ضلعی جنرل سیکریٹری مہر جاوید نے ایک بیان میں انکشاف کیا تھا کہ معظم خان جتوئی کو اغوا کرلیا گیا ہے۔ انہوں نے کہا تھا کہ نامعلوم افراد نے معظم جتوئی کو ملتان میں ان کی رہاشگاہ سے اغوا کیا۔
