سابق کپتان و سوئنگ کے سلطان وسیم اکرم نے پاکستان کرکٹ بورڈ (پی سی بی) میں عہدہ سنبھالنے سے معذرت کی تھی۔ ذرائع کے مطابق سابق کپتان وسیم اکرم کو چیف ایگزیکٹو آفیسر (سی ای او) یا چیئرمین کا مشیر بننے کی پیشکش ہوئی تھی لیکن دیگر مصروفیات کے سبب وہ کل وقتی ملازمت کے لیے دستیاب نہیں تھے اس لیے ان کے انکار پر ہی وقار یونس کا تقرر کیا گیا۔
مزید پڑھیں:وقار یونس نے ایک بار پھر پی سی بی میں اہم ذمہ داری سنبھال لی
بورڈ ذرائع نے بتایا کہ چند روز قبل محسن نقوی نے وسیم اکرم سے رابطہ کرکے کہا کہ وہ پی سی بی کے چیف ایگزیکٹیو آفیسر یا ان کے مشیر کی پوسٹ سنبھال لیں، یہ کل وقتی ملازمت ہوگی، کرکٹ کے تمام امور انہی کو دیکھنا ہوں گے۔ وسیم اکرم نے چیئرمین سے معذرت کرتے ہوئے کہا کہ وہ مستقل طور پر کراچی میں مقیم ہیں، فیملی کی وجہ سے اکثر آسٹریلیا جانا پڑتا ہے، ان کے لیے اب لاہور میں رہائش پذیر ہونا ممکن نہیں۔ البتہ جب بھی پاکستان کرکٹ کو ان کی ضرورت ہوئی وہ بلامعاوضہ دستیاب ہوں گے۔
مزید پڑھیں:’مجھے پاکستانی مت پکارو‘: وقاریونس نے پارٹی کیوں بدلی؟
چیئرمین نے وسیم اکرم سے اپنے مستقبل کے پلانز بھی شیئر کیے جن سے وسیم اکرم خاصے متاثر نظر آئے، بورڈ حکام نے اس کے بعد وقار یونس سے رابطہ کیا جو ذمہ داری سنبھالنے پر آمادہ ہو ئے اور ذمہ داری سنبھال لی۔
واضح رہے کہ چیئرمین پاکستان کرکٹ بورڈ (پی سی بی) محسن نقوی وفاقی وزیر داخلہ بھی ہیں، 2 عہدوں کی وجہ سے کرکٹ کو زیادہ وقت نہیں دیتے، اس مسئلے کو حل کرنے کے لیے انہوں نے کھیل کے معاملات کسی سابق کرکٹر کو سونپنے کا فیصلہ کیا۔
