محکمہ داخلہ پنجاب نے نادار قیدیوں کی امداد کے لیے صوبے بھر کی تمام 43 جیلوں میں فری لیگل ایڈ کمیٹیاں قائم کردی ہیں، وزیر اعلیٰ پنجاب مریم نواز کہتی ہیں کہ اب پنجاب میں کوئی غریب قیدی وکیل کی سہولت سے محروم نہیں رہے گا۔
وزیراعلیٰ پنجاب کی ہدایت پر صوبائی محکمہ داخلہ نے صوبے بھر کی جیلوں میں نادار قیدیوں کو مفت لیگل ایڈ فراہم کر دی ہے، یہ لیگل ایڈ کمیٹیاں پنجاب بار کونسل اور ضلعی بار ایسوسی ایشنز کے اشتراک سے تشکیل دی گئی ہیں۔
یہ بھی پڑھیں: پنجاب میں ’فری میڈیسن ڈیلیوری پراجیکٹ‘ کا افتتاح: گھر کی دہلیز پر ادویات فراہم کریں گے، مریم نواز
صوبائی حکومت کے اعلامیہ کے مطابق نادار اسیران جو مقدمات کی پیروی کے لیے وکیل کا انتظام نہیں کر سکتے انہیں فری لیگل ایڈ فراہم کی جائے گی، مستحق اسیران اپنے متعلقہ سپرنٹینڈنٹ جیل کو قانونی مدد فراہم کرنے کی درخواست دے سکیں گے، جنہیں وکلا کی سہولت سے ملوایا جائے گا۔
’پنجاب بھر میں کل 447 وکلا کو فری لیگل ایڈ کمیٹیوں میں شامل کیا گیا ہے، لاہور ڈویژن میں 45 وکلا، گوجرانولہ ڈویژن میں 90، راولپنڈی میں 70 وکلاء شامل ہیں۔‘
مزید پڑھیں: ملک کو چلنے دیں، وزیر اعلیٰ پنجاب مریم نواز کی سپریم کورٹ کے ججز سے استدعا
اعلامیہ کے مطابق فیصل آباد ڈویژن میں 47، ملتان میں 45، سرگودھا میں 24 وکلا جبکہ بہاولپور ڈویژن میں 55، ساہیوال میں 55 اور ڈی جی خان میں 16 وکلا فری لیگل ایڈ کمیٹی میں شامل ہیں۔
