ہر سال پاکستانیوں کی بڑی تعداد سیاحت کے لیے ترکیہ کا رخ کرتی ہے۔ تاریخی اور سیاحتی مقامات اور تفریح کے منفرد ذرائع دنیا بھر سے سیاحوں کو تیزی سے ترکیہ کی طرف راغب کر رہے ہیں۔ ترکی جانے کے لیے ویزا درکار ہے۔ پاکستان میں اناطولیہ ویزا ایپلیکیشن سینٹرز ترکیہ کے وزٹ ویزا کے لیے درخواستیں قبول کرتے ہیں۔
ترکیہ کے وزٹ ویزا کی درخواست کے ساتھ بینک اسٹیٹمنٹ، ہیلتھ انشورنس، ایئر ٹکٹ کی تفصیلات، تصویر، فنگر پرنٹس، ہوٹل ریزرویشن اور دیگر تفصیلات بھی جمع کرانا ضروری ہیں۔
اناطولیہ ویزا ایپلیکیشن سینٹر عام درخواست کے لیے 65 امریکی ڈالر اور وی آئی پی درخواست کے لیے 80 ڈالرز کی سروس فیس لیتا ہے۔ پاکستان سے سفر کرنے والے پاکستانیوں اور غیر ملکیوں کو ایکسچینج ریٹ کے مطابق ویزا فیس پاکستانی کرنسی میں ادا کرنا ہوگی۔ ویزا فیس ناقابل واپسی ہے۔
مزید پڑھیں:پاکستانی ہنرمندوں کے لیے کروشیا جانے کا سنہرا موقع، مگر کیسے؟
ترکیہ میں ایک داخلے (سنگل انٹری) کے لیے سفارت خانے کی فیس 60 ڈالر اور متعدد داخلوں (ملٹی پل انٹری) کے لیے 190ڈالر ہے۔ صرف اناطولیہ ویزا درخواست مراکز سے دستیاب سفری ہیلتھ انشورنس قبول کی جائے گی۔ ٹریول ہیلتھ انشورنس کی میعاد بھی اس تاریخ سے شروع ہوگی جس تاریخ کو ویزا کی درخواست جمع کروائی گئی ہے۔
ترکیہ کا دورہ کرنے کے خواہشمند افراد کو ترکی کے سفارت خانے یا قونصل خانے کی ہدایات کے مطابق 3، 6 یا 12 ماہ کی بنیاد پر ترکی آنے والی ٹریول ہیلتھ انشورنس بھی حاصل کرنی چاہیے۔ 3 ماہ کا سفری ہیلتھ انشورنس 55 ڈالر، 6 ماہ کا سفری ہیلتھ انشورنس 75 ڈالر اور ایک سال کا سفری ہیلتھ انشورنس 95 ڈالر ہے۔
