بلوچستان کے علاقے مستونگ میں فائرنگ سے ایک صحافی جاں بحق ہوگیا ہے۔
ڈی پی او مستونگ نعیم اچکزئی کے مطابق مستونگ میں زمینی تنازعے پر فائرنگ ایک شخص جاں بحق ہوگیا، جاں بحق ہونے والے شخص کی شناخت نثار احمد لہڑی کے نام سے ہوئی ہے، جو پیشے سے صحافی ہے، وہ سراوان پریس کلب مستونگ کے پریس سیکریٹری بھی تھے۔
یہ بھی پڑھیں: خضدار: یوم صحافت پر صحافی قتل، کیا مولانا صدیق مینگل کو کوئی تھریٹ تھا؟
ڈی پی او مستونگ نے بتایا کہ نثار احمد لہڑی اور ان کی خاندان کی مشترکہ زمین پر کھدائی کا کام جاری تھا، کھدائی کے کام کو روکنے کے لیے نثار احمد لہڑی مزدوروں کو زمین پر لے گیا، اس دوران نثار احمد اور ان کے کزنز کے درمیان تلخ کلامی ہوئی اور فائرنگ کی گئی۔
’ فائرنگ کے نتیجے میں نثار احمد کو 6 گولیاں لگیں جس سے وہ جانبحق ہو گئے، ملزم فائرنگ کے بعد موقع سے فرار ہوگیا، ملزم کے خلاف مقدمہ درج کرلیا گیا ہے۔‘
قاتلوں کو فوری گرفتار کیا جائے، بلوچستان یونین آف جرنلسٹس کا مطالبہ
دوسری جانب بلوچستان یونین آف جرنلسٹس نے سراوان پریس کلب مستونگ کے پریس سیکریٹری نثار احمد لہڑی کی شہادت پر گہرے دکھ اور غم کا اظہار کرتے ہوئے مطالبہ کیا ہے کہ قاتلوں کو فوری گرفتار کرکے مظلوم خاندان کو انصاف کی فراہمی یقینی بنائی جائے۔
یہ بھی پڑھیں: میکسیکو:ایک ہی روز میں 5 صحافیوں کو گولی مار دی گئی، 5سال میں 54 صحافی قتل
بی یو جے نے اپنے ایک جاری بیان میں مستونگ کے سینئر صحافی کے قتل کو شعبہ صحافت کے لئے ایک سانحہ قرار دیتے ہوئے کہا ہے کہ نثار احمد کی شہادت کا سن کر انتہاٸی دکھ اور افسوس ہوا، وہ ایک نڈر اور بے باک صحافی تھے جنکی شہادت سے مستونگ سمیت بلوچستان بھر کی صحافت میں جو خلا پیدا ہوا وہ مدتوں پر نہیں ہوگا۔
بلوچستان یونین آف جرنلسٹس کا کہنا ہے کہ نثار احمد لہڑی کی صحافتی، سیاسی و سماجی خدمات ہمیشہ یاد رکھی جائیں گی۔
