عالمی شہرت یافتہ اداکارہ ماہرہ خان نہ صرف اپنی صلاحیتوں اور خوبصورتی کے لیے جانی جاتی ہیں بلکہ وہ اس لیے بھی جانی جاتی ہیں کہ انہوں نے متعدد بین الاقوامی پلیٹ فارمز پر ملک کی مثبت نمائندگی کی ہے۔
ماہرہ خان ان دنوں لندن میں موجود ہیں، جہاں سے انہوں نے سوشل میڈیا پلیٹ فارم ایکس پر اپنے مداحوں کے ساتھ ’آسک ماہرہ سیشن‘ کیا اور اپنی زندگی اور کیریئر کے بارے میں دلچسپ باتیں ان کے ساتھ شیئر کیں۔
ادکارہ نے بتایا کہ انہوں نے ویب سیریز بارواں کھلاڑی سے پروڈکشن شروع کی، ماہر خان نے خصوصی ٹیلی فلم ’ایک ہے نگار‘ میں پاکستان فوج کی تاریخ کی پہلی تھری اسٹار خاتون لیفٹیننٹ جنرل نگار جوہر کا کردارادا کیا تھا، اس منفرد فلم کے حوالے سے ماہرہ خان نے کہا کہ یہ ایک بہت اچھی فلم ہے اور وہ مستقبل میں ایسی فلموں کی منتظر ہیں۔
ایک مداح نے سوال جواب کے سیشن میں ماہرہ خان کو تجویز دی کہ انہیں ایک ایسا پروڈکشن ہاؤس شروع کرنا چاہیے جو ٹی وی کے لیے مختصر سیریز بنائے، یہ فلمیں ہی کیوں نہ ہوں ہمیں اچھے ٹی وی سیریز کی ضرورت ہے۔
جواب میں ماہرہ خان نے کہا ’یہ پیچیدہ عمل ہے خاص طور پر اگر آپ ڈرامے نہیں بنارہے جو مختصر سیریز یا فلموں جیسی چیزیں بنانے کے لیے درکار رقم فراہم کرسکتے ہیں، میں واقعی میں چند کہانیوں کو اکٹھا کرنے کی کوشش کررہی ہوں، اس حوالے سے شاید دوسرے پروڈکشن ہاؤسز کے ساتھ تعاون کر کے کام کا آغاز کروں، دیکھتے ہیں کیا ہوتا پے۔‘
ایک مداح نے ماہرہ خان سے سوال کیا کہ اداکاروں یا اداکاراؤں میں سے ان کا پسندیدہ کون ہے؟ جواب میں انہوں نے کہا کہ ان کے بہت سے پسندیدہ اداکار ہیں، لیکن اس وقت ان کے پسندیدہ اداکار احمد علی اکبر ہیں۔
ماہرہ خان نے سبینا فاروق، ماورا حسین اور ہانیا عامر جیسی موجودہ اداکاراؤں کی تعریف کی جو پاکستانی ٹیلی ویژن پر بہت اچھا کام کررہی ہیں۔
ماہرہ خان نے مداحوں کو یہ بھی بتایا کہ ان کا بیٹا ازلان ان کے ساتھ لندن نہیں گیا ہے کیوں کہ وہ اسکول میں مصروف ہیں، کیوں کہ اس کی پڑھائی کے لیے یہ سال اہم ہے۔
شاہ رخ خان کے ساتھ فلم رئیس سے کیا سیکھا؟ اس سوال کے جواب میں ماہرہ خان نے کہا کہ شاہ رخ خان نے انہیں نصیحت کی کہ وہ پازیٹو رہیں اور ہمیشہ اپنی زندگی میں خوشی کو موقع دیں۔
