سول ایوی ایشن اتھارٹی نے شمالی وزیرستان میں ماری گیس کمپنی کے ہیلی کاپٹر کو پیش آنے والے حادثے کی تفصیلات جاری کردی ہیں۔
سول ایوی ایشن اتھارٹی کے مطابق ماری گیس کمپنی کے ہیلی کاپٹر نے آج (بروز ہفتہ) دن 11 بجکر 15 منٹ پر اسلام آباد سے شوا وزیرستان کے لیے اڑان بھری، ہیلی کاپٹر نے نئے مسافروں کے ساتھ شوا سے بنوں کے لیے ایک بجکر 15 منٹ پر اڑان بھری۔
یہ بھی پڑھیں: شمالی وزیرستان: ایم آئی 8 ہیلی کاپٹر گر کر تباہ، 6 افراد ہلاک، 8 زخمی
ہنگامی لینڈنگ کے دوران ہیلی کاپٹر کا ٹیل روٹر زمین سے ٹکرایا
انجن میں خرابی کے باعث ہیلی کاپٹر نے شوا میں ہی ہنگامی لینڈنگ کی کوشش کی، ہنگامی لینڈنگ کے دوران ہیلی کاپٹر کا ٹیل روٹر زمین سے ٹکرایا اور وہ الٹ گیا۔
ہیلی کاپٹر میں 6 عملے کےافراد، ایک سیفٹی افسر اور 14 مسافر سوار تھے، حادثے کے بعد پاک آرمی کی مدد سے سرچ اینڈ ریسکیو آپریشن پشاور سے شروع کیا گیا۔
کمپنی نے ہیلی کاپٹر ذاتی طور پر روسی کمپنی سے ویٹ لیز پر لیا
ماری گیس کمپنی اس روسی ساختہ ہیلی کاپٹر کو تیل اور گیس دریافت کے لیے دور افتادہ علاقوں تک پہنچنے کے لیے استعمال کررہی تھی، ہیلی کاپٹر جیٹ کمپنی نے ذاتی طور پر روسی کمپنی (پی اے این ایچ) سے ویٹ لیز پر لیا تھا۔
یہ بھی پڑھیں: خیبرپختونخوا میں سیاحتی مقامات کے لیے ہیلی کاپٹر سروس کا آغاز، کرایہ کتنا ہوگا؟
سول ایویشن اتھارٹی نے ویٹ لیز کے تحت کمپنی کو قانونی تقاضوں کے مطابق ہیلی کاپٹر کے لیے 6 ماہ کا (این او سی) جاری کیا تھا، ویٹ لیز کی معیاد 28 ستمبر 2024 کو پوری ہورہی تھی۔
ہیلی کاپٹر کی دیکھ بھال اور عملہ کی ٹریننگ روسی کمپنی کی تھی
سول ایوی ایشن اتھارٹی کے مطابق ویٹ لیز معاہدہ کے تحت ہیلی کاپٹر کی دیکھ بھال اور عملہ کی ٹریننگ روسی کمپنی (پی اے این ایچ) کے زمہ تھی، بیورو آف سیفٹی انویسٹیگیشن (بی اے ایس آئی) حادثہ کی مزید تحقیقات کرے گا۔
