ملائیشیا کے وزیرِ اعظم عزت مآب داتو سری انور ابراہیم اپنا 3روزہ دورہِ پاکستان مکمل کرکے ملائیشیا روانہ ہوگئے۔ وزیرِ اعظم محمد شہباز شریف، نائب وزیرِ اعظم و وزیرِ خارجہ اسحاق ڈار اور وزیرِ کامرس جام کمال خان نے انور ابراہیم اور ان کے وفد کو نور خان ایئر بیس پر الوداع کیا۔
اس موقع پر وزیر اعظم شہباز شریف نے کہا کہ پاکستان اور ملائیشیا کے مابین دیرینہ برادرانہ تعلقات ہیں جو دہائیوں پر محیط ہیں، ملائیشیا کے وزیرِ اعظم سے پاک ملائیشیا تعلقات کی مزید مضبوطی پر اتفاق ہوا ہے۔ ملائیشیا کے وزیرِ اعظم علامہ اقبال کے مداح ہیں، جو پاکستان کے لیے فخر کی بات ہے۔
مزید پڑھیں: ملائیشین وزیر اعظم کی آرمی چیف سے ملاقات، اسٹریٹجک مفادات، اور دفاعی تعاون پر تبادلہ خیال
وزیرِ اعظم نے کہا کہ ملائیشیا کے وزیرِ اعظم داتو سری انور ابراہیم کے پاکستانی عوام اور حکومت کے لیے اچھے الفاظ اور نیک خواہشات کے تہہ دل سے مشکور ہیں۔ پاک ملائیشیا بزنس فورم میں دونوں ممالک کے مابین تجارت کے فروغ پر مثبت پیشرفت ہوئی ہے۔
شہباز شریف نے کہا کہ پاکستان کی ملائیشیا سے تجارت کے فروغ سے ملکی برآمدات میں اضافہ اور روزگار کے نئے مواقع پیدا ہونگے، وزیرِ اعظم ملائیشیاء کا دورہِ پاکستان، پاک ملائیشیا تعلقات میں ایک نئے باب کا آغاز ثابت ہوا ہے۔
’دونوں ممالک کے مابین تجارت اور سرمایہ کاری کے فروغ کے لیے مفاہمتی یادداشتوں اور معاہدوں کا تبادلہ ہوا، پاکستان سے ملائیشیا کو پراسیسڈ گوشت، اور چاول کی برآمدات میں اضافہ اور طریقہ کار کو سہل بنایا جائے گا‘۔
وزیرِ اعظم نے کہا کہ دونوں ممالک کے مابین انفارمیشن ٹیکنالوجی میں تعاون اور الیکٹرک گاڑیوں کی تیاری و تجارت میں اضافے پر بھی اتفاق ہوا۔
ملائیشیا کے وزیراعظم انور ابراہیم کو نشان پاکستان سے نواز دیا گیا
واضح رہے دورے کے دوران وزیرِ اعظم ملائیشیا کے وزیرِ اعظم شہباز شریف سے وزیرِ اعظم ہاؤس اسلام آباد میں ملاقات ہوئی جہاں انہیں شاندار استقبال پیش کیا گیا، دونوں رہنماؤں نے پاکستان ملائیشیا بزنس فورم میں بھی شرکت کی۔ ملائیشیا کے وزیرِ اعظم کو صدر پاکستان کی جانب سے نشان پاکستان سے بھی نوازا گیا۔
