اسلام آباد ہائی کورٹ نے طیبہ گل ہراسگی کیس میں پبلک اکاؤنٹس کمیٹی کی جانب سےسابق چیئرمین نیب جسٹس ریٹائرڈ جاوید اقبال کو لاپتہ افراد کمیشن کی سربراہی سے ہٹانے کی سفارش معطل کرنے کے حکمِ امتناع میں 28 اپریل تک توسیع کردی ہے۔
اسلام آباد ہائی کورٹ کے چیف جسٹس عامر فاروق نے طیبہ گل ہراسگی کیس میں سابق قائم مقام چیئرمین نیب اور ڈی جی نیب کی پبلک اکاؤنٹس کمیٹی طلبی اور سابق چیئرمین نیب جاوید اقبال کو لاپتہ افراد کمیشن کی سربراہی سے ہٹانے کی سفارش کے خلاف درخواستوں کو یکجا کر کے سماعت کی۔
وفاق کی جانب سے ایڈیشنل اٹارنی جنرل منور اقبال دوگل، اسسٹنٹ اٹارنی جنرل عظمت بشیر تارڑ عدالت میں پیش ہوئے۔ نیب کی جانب سے جہانزیب بھروانہ اور محمد رافع ایڈووکیٹ عدالت میں موجود تھے۔
تاہم پبلک اکاؤنٹس کمیٹی کے وکیل حافظ ایس اے رحمان ایڈووکیٹ کی جانب سے التوا کی درخواست کی گئی۔ ان کے معاون وکیل نے استدعا کی کہ سینیئر کونسل سپریم کورٹ میں مصروف ہیں۔ اس لیے آج کی سماعت ملتوی کی جائے۔
عدالت نے التوا کی استدعا منظور کرتے ہوئے سماعت 28 اپریل تک ملتوی کردی ہے۔
