بنگلہ دیشی کرنسی سے شیخ مجیب کی تصویر جلد ہٹانے کا فیصلہ

بنگلہ دیش کی عبوری حکومت نے کرنسی نوٹوں کو دوبارہ ڈیزائن کرنے اور ان پر سے مرحوم صدر شیخ مجیب الرحمان کی تصویر ہٹانے کا فیصلہ کرلیا۔

یہ بھی پڑھیں: بنگلہ دیش کی یو این رکنیت کی گولڈن جوبلی تقریب، پاکستانی وفد کا پرتپاک استقبال

انگریزی روزنامے ڈھاکہ ٹریبیون کی رپورٹ کے مطابق عبوری حکومت نے مرکزی بینک کو 20، 100، 500 اور ایک ہزار ٹکے کے نوٹوں کے نئے ڈیزائن تجویز کرنے کا ٹاسک دے دیا ہے۔

وزارت خزانہ اور بنگلہ دیش بینک نے اس بات کی تصدیق کی ہے کہ موجودہ ڈیزائنوں میں تبدیلی کے ساتھ ان پر سے شیخ مجیب الرحمان کی تصویر بھی ہٹادی جائے گی۔

ابتدائی طور پر صرف مذکورہ 4 طرح کے نوٹ ری ڈیزائن کیے جائیں گے جبکہ دیگر کا ڈیزائن اگلے مرحلے میں تبدیل کیا جائے گا۔

نیا ڈٖیزائن جلد از جلد بھیجا جائے، حکومت کی مرکزی بینک کو ہدایت

وزارت خزانہ کے ایک خط میں بنگلہ دیش بینک کو ہدایت کی گئی ہے کہ وہ نئے نوٹوں کے لیے تفصیلی ڈیزائن کی تجاویز پیش کرے۔ مرکزی بینک کی کرنسی اور ڈیزائن ایڈوائزری کمیٹی ان تبدیلیوں کا جائزہ لینے اور سفارش کرنے میں کلیدی کردار ادا کرے گی۔

خط میں بینک سے کہا گیا ہے کہ کرنسی اور ڈیزائن ایڈوائزری کمیٹی کی سفارشات کو منظور کرکے پروپوزل جلد از جلد فنانس ڈویژن کو بھیج دیا جائے۔

مزید پڑھیے: حسینہ واجد کے لیے بہتر ہے کہ وہ خاموش رہیں، بنگلہ دیشی عبوری حکومت کے سربراہ محمد یونس

شیخ مجیب الرحمٰن کی تصویر ہٹانے کے فیصلے سے صاف ظاہر ہے کہ عبوری حکومت شیخ مجیب الرحمان کی دختر سابق وزیراعظم شیخ حسینہ واجد کی حکومت میں کیے گئے کچھ مبینہ غیرپسندیدہ کاموں کے نشان مٹانا چاہتی ہے۔ واضح رہے کہ حسینہ کے دور میں کئی نوٹوں اور یہاں تک کہ سکوں پر بھی شیخ مجیب الرحمان کی تصویر نمایاں تھی۔

فی الوقت تمام نوٹوں (2 ٹکا سے لے کر 1000 ٹکا تک کے نوٹ) پر شیخ مجیب الرحمان کی تصویر موجود ہے۔