متحدہ عرب امارات نے بھارتی شہریوں کے لیے ویزا فری انٹری کی سہولت فراہم کرنے کا اعلان کیا ہے، جس کے مطابق شینگن یا امریکا کے کارآمد رہائشی ویزے رکھنے والی بھارتی شہری فیس کی ادائیگی کے بعد ایئرپورٹ پر ویزا حاصل کرکے امارات میں داخل ہوسکیں گے۔
اماراتی فیڈریشن آف امیگریشن اینڈ کسٹمز اتھارٹی کے ڈائریکٹر بریگیڈئیر سہیل سعید الخییلی نے بتایا کہ بھارتی شہریوں کے لیے ویزا پالیسی میں کی گئی تبدیلی دوطرفہ طویل المدتی تذویراتی تعلقات کو مدنظر رکھتے ہوئے کی گئی ہے، ان کے مطابق ویزے کے ضوابط میں اس نوعیت کی رعایت سے سیاحت کو مزید فروغ ملے گا۔
یہ بھی پڑھیں:متحدہ عرب امارات میں فری لانس لائسنس کیسے حاصل کیا جا سکتا ہے؟
میڈیا رپورٹ کے مطابق امیگریشن اینڈ کسٹمز اتھارٹی کی جانب سے بھارت کے لیے ویزا فری انٹری کی سہولت کا اعلان کرتے ہوئے بتایا گیا ہے کہ بھارتی شہری جن کے پاس کارآمد شینگن یا امریکا کا رہائشی ویزا ہو گا انہیں مقررہ فیس کی ادائیگی کے بعد امارات کا ویزا جاری کیا جاسکے گا۔
امیگریشن اینڈ کسٹمز اتھارٹی کے مطابق اماراتی کابینہ نے اس ضمن سے جن ضوابط کی منظوری دی ہے، ان کے تحت امریکا کا رہائشی ویزا یا گرین کارڈ یا پھر یورپی یونین کا کارآمد شینگن ویزا رکھنے والے بھارتی شہریوں کو 14 دن کا ویزا 100 درہم کے عوض ایئرپورٹ پہنچنے پر جاری کیا جائے گا۔
مزید پڑھیں:متحدہ عرب امارات: وزٹ ویزا ہولڈرز کو ملازمت فراہم کرنیوالی کمپنیوں کیخلاف کریک ڈاؤن
میڈیا رپورٹس کے مطابق اتھارٹی کے مطابق اس نوعیت کے ویزے میں توسیع بھی ممکن ہوگی، 14 دن کی توسیع 250 درہم جبکہ 60 دن کے ویزے کی فیس 250 درہم مقرر کی گئی ہے۔
اتھارٹی اس سے قبل۔ متحدہ عرب امارات میں ملازمت کے لیے آنے والے غیر ملکی کارکنوں کے لیے درکار اہم طبی رپورتس کے ضمن میں بھی ہدایات جاری کرچکی ہے، ملک میں آنے والے غیرملکی کارکنوں کو 4 لازمی طبی ٹیسٹ کرانے ہوں گے، جس میں ملازمت کے خواہشمند فرد کی عمومی صحت کی رپورٹ بھی شامل کی گئی ہے۔
