انٹرنیشنل اسلامک ٹریڈ فنانس کارپوریشن (آئی ٹی ایف سی) نے پاکستان کو 3 سال میں 3 ارب ڈالر کی کموڈٹی فنانسنگ فراہم کرنے کا اعلان کیا ہے۔
پروگرام کے تحت پاکستان کو فوری طور پر 269 ملین ڈالر کی براہ راست فنانسنگ کی جائے گی۔ وزیر خزانہ محمد اورنگزیب نے پاکستان کو 3 سال کے لیے کموڈٹی فنانسنگ کے ذریعے مالی معاونت کی فراہمی پر آئی ایف ٹی سی کا شکریہ ادا کیا ہے۔
یہ بھی پڑھیں: معاشی استحکام، ٹیکس محصولات میں اضافے اور نظام کی بہتری میں مصروف ہیں، وزیر خزانہ
قبل ازیں، وزیر خزانہ محمد اورنگزیب نے امریکی محکمہ خارجہ کی اسسٹنٹ سیکریٹری برائے اقتصادیات و کاروباری امور ایمی ہولمین سے واشنگٹن ڈی سی ملاقات کی اور سماجی و اقتصادی ترقی میں پاک، امریکا اقتصادی شراکت داری کی اہمیت کو تسلیم کیا اور امریکی حمایت کا شکریہ ادا کیا۔
اس موقع پر وزیر خزانہ نے زراعت، آئی ٹی، توانائی اور کان کنی کے شعبوں میں سرمایہ کاری کے مواقعوں کی نشاندہی کی اور امریکی کمپنیوں کو ان شعبوں میں سرمایہ کاری کی دعوت دی۔
یہ بھی پڑھیں: پاکستان کی معیشت مثبت گامزن سمت ہو چکی، زرمبادلہ کے ذخائر میں نمایاں اضافہ ہوا، وزیر خزانہ
واشنگٹن میں تھنک ٹینک سے خطاب میں وفاقی وزیر خزانہ محمد اورنگزیب کا کہنا تھا کہ حکومتی اخراجات میں کمی اور مختلف شعبوں میں اصلاحات کے حوالے سے پالیسیاں بنائی جا رہی ہیں- انہوں نے کہا کہ پاکستانی روپیہ مضبوط ہورہا ہے اور ترسیلات میں بہتری آرہی ہے۔
واضح رہے کہ واشنگٹن میں ورلڈ بینک اور آئی ایم ایف کے سالانہ اجلاسوں میں شرکت کے لیے وفاقی وزیر خزانہ محمد اورنگزیب وفد کے ہمراہ امریکا میں موجود ہیں۔
