وزیر اعلیٰ خیبر پختونخوا علی امین خان گنڈاپور نے شمالی وزیرستان کے علاقہ میر علی میں پولیس چیک پوسٹ پر خود کش حملے کی مذمت کرتے ہوئے کہا ہے کہ اس طرح کے بزدلانہ واقعات سے سیکیورٹی فورسز کے حوصلے پست نہیں ہوں گے۔
یہ بھی پڑھیں:ڈیرہ اسماعیل خان: فتنہ الخوارج کے دہشتگردوں کا ایف سی چیک پوسٹ پر حملہ، 10 جوان شہید
ہفتہ کے روز وزیر اعلیٰ خیبر پختونخوا کے پریس سیکریٹری کے دفتر سے جاری تعزیتی بیان میں وزیر اعلیٰ خیبر پختونخوا علی امین خان گنڈاپور نے حملے میں پولیس جوانوں سمیت 8 افراد کی شہادت پر اظہار تعزیت اور تمام شہدا کے اہل خانہ سے دلی ہمدردی کا اظہار کیا ہے۔
وزیر اعلیٰ نے شہدا کے درجات کی بلندی اور پسماندگان کے لیے صبر جمیل کی دعا اور کہا کہ ہم سوگوار خاندانوں کے غم میں برابر کے شریک ہیں۔
یہ بھی پڑھیں: میانوالی : ملا خیل میں پولیس کے آپریشن میں 10 دہشتگرد مارے گئے
انہوں نے کہا کہ صوبائی حکومت حملے میں شہید ہونے والوں کے اہل خانہ کو تنہا نہیں چھوڑے گی اور ان کی بھر پور معاونت کرے گی، عوام کی حفاظت پر مامور پولیس اہلکاروں کو نشانہ بنانا انتہائی افسوسناک اور قابل مذمت ہے۔
مزید پڑھیں:شمالی وزیرستان: پولیو ٹیم پر دہشتگرد حملہ، محافظ فوجی جوان شہید
وزیر اعلیٰ کے پی کے نے کہا کہ دہشتگردی کے خلاف جنگ میں فورسز اور عوام نے لازوال قربانیاں دی ہیں، اس طرح کے بزدلانہ واقعات سے فورسز کے حوصلے پست نہیں ہوں گے، دہشتگردی کے خلاف جنگ میں پوری قوم اپنے فورسز کے ساتھ ہے۔ وہ دن دور نہیں جب ہم دہشتگردی کو شکست دے کر ملک میں مکمل امن قائم کریں گے۔
