پنجاب حکومت نے اسموگ کے پیش نظر لاہور کے مختلف علاقوں میں گرین لاک ڈاؤن لگا دیا۔
ڈی جی ماحولیات پنجاب عمران حامد شیخ کے مطابق بڑھتی ہوئی اسموگ اور فضائی آلودگی کو کم رکھنے کے لہے پنجاب حکومت نے یہ اقدام اٹھایا ہے۔
یہ بھی پڑھیں فضائی آلودگی بڑھنے کا خدشہ، پنجاب حکومت کا اسموگ الرٹ جاری
جن علاقوں میں گرین لاک ڈاؤن لگایا گیا ہے ان میں ڈیوس روڈ، ایجرٹن روڈ ، ڈیورنڈ روڈ اور کشمیر روڈ شامل ہیں۔
اس کے علاوہ شملہ پہاڑی سے گلشن سینیما اور ایبٹ روڈ، جبکہ شملہ پہاڑی سے ریلوے اسٹیشن اور ایمپریس روڈ بھی پابندی والے علاقوں میں شامل ہے۔
نوٹیفکیشن کے مطابق کوئین میری روڈ اور اس کے اطراف کو بھی آلودگی والے علاقوں میں شامل کیا گیا ہے۔
محکمہ ماحولیات کے مطابق جن علاقوں میں گرین لاک ڈاؤن لگایا گیا ہے وہاں تعمیراتی سرگرمیوں پر مکمل پابندی عائد ہوگی، اس کے علاوہ چنگ چی رکشے بھی نہیں چل سکیں گے۔
لاک ڈاؤن والے علاقوں میں کمرشل جنریٹر چلانے پر بھی پابندی ہوگی، جبکہ باربی کیو اور کھلے فوڈ پوائنٹس رات 8 بجے کے بعد بند ہوجائیں گے۔
یہ بھی پڑھیں پنجاب میں اسموگ کا باعث بننے والے بھٹے بنا نوٹس دیے ڈھانے کا حکم
نوٹیفکیشن میں کہا گیا ہے کہ گرین لاک ڈاؤن کی خلاف ورزی کرنے والوں کے خلاف کارروائی کی جائے گی۔
