وفاقی وزیر داخلہ محسن نقوی اور وزیر اعلیٰ بلوچستان سرفراز بگٹی نے سول اسپتال کوئٹہ کا دورہ کیا، جہاں انہوں نے گزشتہ روز کوئٹہ ریلوے اسٹیشن پر ہوئے دھماکے کے زخمیوں کی عیادت کی۔
یہ بھی پڑھیں:کوئٹہ دھماکا، جعفر ایکسپریس اور بولان میل کی سروس کب تک معطل رہے گی؟
اس موقع پر وفاقی وزیر داخلہ محسن نقوی اور وزیر اعلیٰ بلوچستان سرفراز بگٹی نے اس ہولناک سانحہ میں زخمی ہونے والوں کے بلند حوصلے کو سراہا۔
وفاقی وزیر داخلہ نے اسپتال کے دورے کے دوران متعلقہ ڈاکٹرز سے زخمیوں کی صحت کے حوالے سے بات چیت کی، اس کلے علاوہ انہوں نے زخمیوں کی جلد صحتیابی کے لیے دعا بھی کی۔
زخمیوں کی عیادت کے موقع پر وفاقی وزیر داخلہ نے زخمیوں سے کہا کہ پوری قوم آپ کے ساتھ ہے اور آپ کی جلد صحتیابی کے لیے دعا گو ہے، آپ کے علاج معالجے میں کوئی کسر نہیں چھوڑی جائے گی۔
اس موقع پر وفاقی وزیر داخلہ کے ہمراہ موجود وزیراعلیٰ بلوچستان سرفراز بگٹی نے ڈاکٹرز کو زخمیوں کے بہترین علاج سے متعلق ہدایات دیں اور ایک زخمی شخص کو فوری طور پر کراچی شفٹ کرنے کا حکم دیا۔
یاد رہے کہ گزشتہ روز کوئٹہ ریلوے اسٹیشن ہونے والے خودکش دھماکے میں خاتون سمیت 27 افراد جاں بحق اور 40 افراد زخمی ہو گئے تھے۔
