اسرائیلی آبادکاروں نے مقبوضہ مغربی کنارے کے گاؤں ابو فلاح میں زیتون کی فصل چننے والے فلسطینی کسانوں پر حملہ کرکے باغات کو آگ لگا دی اور پتھراؤ کیا، جبکہ واقعے کی کوریج کرنے والی امریکی صحافی ہیڈی لیوائن کو بھی تشدد کا نشانہ بنایا گیا۔
خبر رساں ادارے رائٹرز کے مطابق جمعے کو تقریباً 80 نقاب پوش اسرائیلی آبادکار ابو فلاح میں زیتون کے باغات میں داخل ہوئے اور فلسطینی کسانوں پر پتھر برسائے۔ حملے کے دوران باغات میں آگ لگائی گئی اور کم از کم 2 افراد زخمی ہوئے، جن میں امریکی اخبار ’واشنگٹن پوسٹ‘ کی فوٹو جرنلسٹ ہیڈی لیوائن بھی شامل ہیں۔
Clad in black and their faces masked, dozens of militant Israeli settlers burned olive trees and threw rocks at Palestinians in a coordinated attack on a West Bank village's annual harvest that injured at least two people including a journalist https://t.co/829S8ja3gK pic.twitter.com/h4Js33cEoc
— Reuters (@Reuters) October 16, 2026
رائٹرز اور واشنگٹن پوسٹ کی رپورٹ کے مطابق حملہ آوروں نے صحافی کو زمین پر گرا کر بار بار لاتیں ماریں اور ان کا کیمرا اور فون چھین لیا۔ صحافی نے بتایا کہ حفاظتی جیکٹ اور ہیلمٹ پہننے کی وجہ سے وہ مزید سنگین چوٹوں سے محفوظ رہیں۔
انہیں علاج کے لیے رام اللہ کے اسپتال منتقل کیا گیا۔ واشنگٹن پوسٹ کے مطابق ان کی پسلی ٹوٹ گئی، جسم پر زخم آئے اور ہاتھ کی انگلی شدید زخمی ہونے کے باعث آپریشن کی ضرورت پیش آئی۔
یہ بھی پڑھیں:فلسطینی تاریخ پر بچوں کی کتاب کی اشاعت پینگوئن رینڈم ہاؤس نے روک دی
رپورٹس کے مطابق اسرائیلی فوجی بھی جائے وقوعہ پر پہنچے، تاہم حملہ جاری رہا۔ فوجیوں نے فلسطینیوں کی سمت آنسو گیس فائر کی، جبکہ علاقے میں فائرنگ کی آوازیں بھی سنی گئیں۔ اسرائیلی فوج کا کہنا ہے کہ اہلکاروں نے صورت حال کے دوران وارننگ فائر کیے اور واقعے کا جائزہ لیا جا رہا ہے۔
امریکی محکمہ خارجہ نے واقعے پر تشویش کا اظہار کرتے ہوئے کہا ہے کہ وہ متاثرہ امریکی شہری کو ضروری قونصلر معاونت فراہم کرنے کے لیے تیار ہے۔ واشنگٹن پوسٹ کی انتظامیہ نے صحافی پر حملے کی مذمت کرتے ہوئے مکمل تحقیقات کا مطالبہ کیا ہے۔
Israeli settlers attack the Washington Post photographer while recording violence against Palestinian olive pickers in the West Bank. pic.twitter.com/iiu7Ff1pKy
— HatsOff (@HatsOffff) October 16, 2026
رائٹرز کے مطابق اسرائیلی آبادکاروں کے فلسطینیوں پر حملوں میں حالیہ ہفتوں کے دوران اضافہ ہوا ہے۔ اسرائیلی تنظیم یش دین کے مطابق 27 ستمبر سے اب تک آبادکاروں کے کم از کم 170 حملے ریکارڈ کیے جا چکے ہیں۔
