الیکشن کمیشن نے ممبر قومی اسمبلی عادل بازئی کی نا اہلی کے لیے ریفرنس پر فیصلہ محفوظ کرلیا۔ کمیشن نے پی ٹی آئی کے سینیٹر سیف اللہ ابڑو سے نا اہلی ریفرنس پر 3دسمبر تک جواب مانگ لیا۔
چیف الیکشن کمشنر سکندر سلطان راجہ کی سربراہی میں تین رکنی کمیشن نے سماعت کی۔ عادل بازئی کے وکیل نے کمیشن میں جمع کروایا گیا بیان حلفی جعلی ہونے کا موقف اپناتے ہوئے کہا کہ بیان حلفی کا فرانزک ٹیسٹ کروا لیں جعلی ثابت ہوگا۔
وکیل نے کہا کہ انہوں نے کبھی ن لیگ میں شمولیت اختیار نہیں کی۔ ن لیگ کے ریفرنس میں بھی درج ہے کہ عادل بازئی کبھی حکومتی بینچز پر نہیں بیٹھے۔ موکل کا شناختی کارڈ نمبر بھی درست نہیں لکھا گیا۔
مزید پڑھیں: الیکشن کمیشن کے معاندانہ رویے کیخلاف کے پی حکومت نے رٹ پٹیشن دائر کرنیکا فیصلہ کرلیا
وکیل نے مزید کہا کہ اسٹامپ پیپر پر نوٹری پبلک کی تفصیلات بھی درج نہیں۔ 27ستمبر 2024 تک عادل بازئی قومی اسمبلی کی ویب سائٹ پر آزاد رکن تھے۔
چیف الیکشن کمشنر نے کہا کہ اگر عادل بازئی نے سنی اتحاد کونسل میں شمولیت کا بیان حلفی جمع کروایا تھا تو انہوں نے کمیشن سے رابطہ کیوں نہیں کیا۔ ممبر سندھ نے کہا کہ آپ اتنا عرصہ خاموش کیوں رہے؟
وکیل عادل بازئی نے بتایا کہ خاموش اس لیے رہے کہ یہ بیان حلفی کبھی منظر عام پر نہیں آیا تھا۔ اسپیکر قومی اسمبلی نے ریفرنس پر کوئی تحقیقات نہیں کیں، عادل بازئی نے 20 فروری کو سنی اتحاد کونسل میں شمولیت کا بیان حلفی جمع کروایا۔
وکیل ن لیگ نے دلائل دیتے ہوئے کہا کہ انہیں 11ماہ بعد کیوں یاد آیا کہ بیان حلفی جعلی ہے۔ عادل بازئی نے ن لیگ میں شامل ہونے کا حلف نامہ جمع کرایا۔ استدعا ہے کہ پارٹی پالیسی سے انحراف پر انہیں نا اہل کیا جائے۔ الیکشن کمیشن نے دلائل مکمل ہونے پر فیصلہ محفوظ کرلیا۔
یہ بھی پڑھیں: عادل بازئی کی نااہلی کے لیے قومی اسمبلی نے الیکشن کمیشن کو پھر خط لکھ دیا
پی ٹی آئی کے سینیٹر سیف اللہ ابڑو کی نا اہلی کے لیے دائر ریفرنس پربھی کمیشن میں سماعت ہوئی۔ وکیل سیف اللہ ابڑو نے موکل کیخلاف ریفرنس قابل سماعت نہ ہونے کا موقف اپنایا۔
جس پر چیف الیکشن کمشنرنے کہا کہ آپ پہلے تحریری جواب جمع کروائیں اور قابل سماعت نہ ہونے سے متعلق درخواست دیں۔ کمیشن نے سیف اللہ ابڑو سے جواب طلب کرتے ہوئے سماعت 3دسمبر تک ملتوی کردی۔
