قومی کرکٹ ٹیم کے کپتان محمد رضوان نے کہا ہے کہ چیمپئنز ٹرافی سے متعلق فیصلہ بورڈ نے کرنا ہے، اگر بھارتی ٹیم چیمپئنز ٹرافی کھیلنے پاکستان آئی تو اسے ویلکم کریں گے۔
آسٹریلیا کے خلاف ٹی20 سیریزسے قبل برسبین میں میڈیا سے گفتگو کرتے ہوئے کپتان محمد رضوان نے کہا کہ آسٹریلیا کے خلاف آسٹریلیا میں کھیلنا آسان نہیں ہوتا لیکن جیت کے لیے ٹیم میں بہترین پلیئرز کو شامل کریں گے۔
یہ بھی پڑھیں: آسٹریلیا کے خلاف ٹی20 سیریز سے قبل کپتان محمد رضوان کا ٹیم کے نام اہم پیغام
پلیئنگ الیون سے متعلق سوال کے جواب میں انہوں نے کہا کہ اس بارے میں مشاورت کی ہے لیکن کچھ باتوں کو ابھی خفیہ رکھا ہے، بطور کپتان ٹیم کے بہترین مفاد میں دوسروں کےساتھ مشورہ کرتا ہوں، جیسن گلیسپی کو ہماری جیت کا کریڈٹ جاتا ہے، وہ ایک بہترین کوچ ہیں۔
ایک سوال کے جواب میں انہوں نے کہا کہ فخر زمان، افتخار احمد، محمد عامر اور شاداب خان زبردست کھلاڑی ہیں اور کافی عرصہ سے پاکستان کے لیے کھیل رہے ہیں، ان کی کمی کو آسانی سے پورا نہیں کیا جاسکتا۔
یہ بھی پڑھیں: ’بھارت چیمپیئنز ٹرافی کھیلنے کے لیے نہ آیا تو پاکستان آئندہ ان کے ساتھ کوئی میچ نہیں کھیلے گا‘
واضح رہے کہ آسٹریلیا اور پاکستان کی کرکٹ ٹیموں کے درمیان 3 ٹی20 انٹرنیشنل میچوں پر مشتمل سیریز کا پہلا میچ 14 نومبر (جمعرات) کو دی گابا، برسبین، دوسرا ٹی20 میچ 16 نومبر کو سڈنی کرکٹ گراؤنڈ جبکہ تیسرا اور آخری ٹی20 میچ 18 نومبر کو بیلریو اوول ہوبارٹ میں کھیلا جائے گا۔
قبل ازیں، پاکستان نے 22 سال بعد آسٹریلیا کو اس کے ہوم گراؤنڈ پر ون ڈے سیریز میں شکست دی تھی۔ آسٹریلیا نے پاکستان کو پہلے ون ڈے میچ میں 2 وکٹوں سے شکست دی تھی، جس کے بعد پاکستان نے دوسرے ون ڈے میچ میں آسٹریلیا کو 9 وکٹوں سے شکست دے کر سیریز 1-1 سے برابر کر دی اور پھر تیسرے ون ڈے میچ میں 8 وکٹوں سے ہرا کر سیریز 1-2 سے اپنے نام کی تھی۔
