چیئرمین پاکستان کرکٹ بورڈ (پی سی بی) محسن نقوی نے کہا کہ چیمپیئنز ٹرافی پاکستان میں ہی ہوگی، اور ایسی کوئی بات بھی نہیں ہے جس سے بھارت کو مسئلہ ہو، بھارت سے ابھی بھی اچھے کی توقع کرتے ہیں۔ آئی سی سی تمام کرکٹ ٹیموں کی باڈی ہے اپنی ساکھ کا خیال رکھنا چاہیے۔
چیئرمین پی سی بی محسن نقوی نے لاہور میں میڈیا سے گفتگو کرتے ہوئے کہا کہ چیمپیئنز ٹرافی پاکستان میں ہی کرائیں گے، اسٹیڈیمز کا تعمیراتی کام تیزی سے جاری ہے، جلد تعمیر مکمل ہوجائے گی اور چیمپیئنز ٹرافی کا انعقاد پاکستان میں ہی ہوگا۔
مزید پڑھیں: بھارتی دباؤ، آئی سی سی نے پاکستان میں چیمپیئنز ٹرافی ٹور سے آزاد کشمیر اور گلگت بلتستان کو نکال دیا
محسن نقوی نے کہا کہ کھیل اور سیاست الگ الگ چیزیں ہیں، میں ابھی بھی اس بات پر یقین رکھتا ہوں کہ کھیل کو سیاست سے الگ رکھنا چاہیے۔ دنیا کی تمام ٹیمیں چیمپیئنز ٹرافی کھیلنے پاکستان آرہی ہیں، بھارت کو ابھی بھی کوئی مسئلہ ہے تو ہم ان کے تحفظات کو دور کرنے کے لیے تیار ہیں۔
ہیڈ کوچ سے متعلق سوال کے جواب میں چیئرمین پی سی بی کا کہنا تھا کہ عارضی طور پر عاقب جاوید سے درخواست کی ہے کہ چیمپیئنز ٹرافی تک فرائض سرانجام دیں۔ عاقب جاوید صرف وائٹ بال کے ہیڈ کوچ ہیں، چیمپیئنز ٹرافی کے بعد ان کے لیے مزید زمہ داریاں دیکھ دیکھ رہے ہیں جن پر وہ خود کام کرنا چاہتے ہیں۔
یہ بھی پڑھیں: چیمپیئنز ٹرافی کا شیڈول فوری جاری کیا جائے، براڈکاسٹرز نے آئی سی سی پر دباؤ بڑھا دیا
انہوں نے کہا کہ ایسا کوئی مسئلہ ہے ہی نہیں کہ بھارتی ٹیم پاکستان نہ آسکے، آئی سی سی سے براہ راست رابطے میں ہیں، ہم نے ان کو خط لکھ دیا ہے اب ان کے جواب کا انتظار کررہے ہیں۔
’پاکستان کی عزت سب سے پہلے ہے، ہم نے جو موقف اپنایا ہے اس پر قائم ہیں‘۔
ان کا مزید کہنا تھا کہ وہاب ریاض ابھی بھی کام کررہے ہیں، میرے لیے تمام کرکٹرز باعث احترام ہیں، محمد یوسف اور عبدالرزاق کو بھی کہیں نہیں جانے دے رہا ہوں، میں تو کرکٹرز کو اکٹھا کررہا ہوں کہ آئیں اور مل کر کام کریں۔
