وزیر اعلیٰ پنجاب مریم نواز شریف نے صوبے بھر میں بجلی کے صارفین کے لیے فری سولر پینل اسکیم کا باقاعدہ افتتاح کردیا ہے، اس اسکیم کے تحت ایک لاکھ صارفین کو سولر پینل مفت فراہم کیے جائیں گے۔
پنجاب کے صارفین آج سے ہی ایس ایم ایس یا آن لائن پورٹل پر گھر بیٹھے مفت سولر پینل کے لیے اپلائی کرسکتے ہیں۔
یہ بھی پڑھیں:سولر پینل فنانسنگ اسکیم کو آسان تر بنایا جائے، مریم نواز کے احکامات
اس موقع پر وزیراعلی مریم نوازشریف کا کہنا تھا کہ فری سولر پینل اسکیم کا مقصد عوام کو مہنگی بجلی سے مستقل ریلیف فراہم کرنا ہے، انہوں نے بتایا کہ فی یونٹ 14روپے سبسڈی سے پنجاب کے 73لاکھ صارفین مستفید ہوئے، عوام کے وسائل عوام کی سہولت اور ریلیف کے لیے ہی خرچ ہوں گے-
صوبائی سیکریٹری انرجی نے وزیراعلیٰ پنجاب کو بریفنگ دیتے ہوئے بتایا کہ پنجاب میں ایک لاکھ سولر سسٹم انسٹال کرنے سے 57ہزار ٹن کاربن کااخراج کم اور فری سولرپینل اسکیم سے وفاقی حکومت پر بھی سبسڈی کا بوجھ بھی کم ہوگا۔
مزید پڑھیں:سی پیک کے اپ گریڈڈ وژن میں پنجاب کی شمولیت کا خیرمقدم کریں گے؛ چینی سفیر کی نواز شریف سے ملاقات
بریفنگ میں بتایا گیا کہ سی ایم پنجاب فری سولر پینل اسکیم کے تحت سال بھر میں ایک لاکھ سولر سسٹم لگائے جائیں گے، صوبہ بھر میں ماہانہ 200 یونٹ تک بجلی استعمال کرنے والے صارفین کو سولر سسٹم مفت دیا جائے گا۔
100 یونٹ ماہانہ بجلی صرف کرنے والے 52 ہزار 19صارفین کو 550 واٹ کا مفت سولر سسٹم دیا جائے گا، 200 یونٹ تک ماہانہ بجلی صرف کرنے والے صارفین کو 1100 واٹ کا سولر سسٹم مفت ملے گا۔
مزید پڑھیں:پنجاب میں جھینگے کی فارمنگ کا پائلٹ پراجیکٹ، مریم نواز نے مراعات کا اعلان کردیا
سیکریٹری انرجی کے مطابق پنجاب کے بجلی صارفین فری سولر پینل اسکیم کے لیے 8800 پرایس ایم ایس بھیج کر رجسٹریشن کرا سکتے ہیں، سی ایم فری سولر پینل اسکیم کی رجسٹریشن کے لیے پورٹل cmsolarscheme.punjab.gov.pk پر آن لائن بھی اپلائی کیاجاسکتا ہے۔
وزیراعلیٰ پنجاب کو بتایا گیا کہ سی ایم پنجاب فری سولر پینل اسکیم میں شفافیت کے لیے کمپیوٹرائزڈ قرعہ اندازی کی جائے گی، مفت سولر پینل حاصل کرنے والے صارفین کی معاونت اور رہنمائی کے لیے ہیلپ لائن بھی قائم کی جائے گی، سولر پینل اور انورٹر کو چوری سے بچانے کے لیے صارف کے کمپیوٹرائزڈ شناختی کارڈ سے منسلک کیا جائے گا۔
