حال میں اداکارہ ماہرہ خان نے اپنے ایک بیان میں کہا کہ وہ اداکار فردوس جمال کو نہیں جانتیں۔
ماہرہ خان نے کراچی آرٹس کونسل آف پاکستان میں 17ویں اردو کانفرنس کے سیشن ’میں ہوں کراچی‘ میں بات کرتے ہوئے مختلف معاملات پر کھل کر بات کی۔
یہ بھی پڑھیں: ’ماہرہ خان بوڑھی عورت، ہمایوں سعید ڈاکو ہیں‘ فردوس جمال کی تنقید
عالمی اردو کانفرنس ادبی میلے میں وسیم بادامی نے ماہرہ خان سے ریپڈ فائر سوالات کیے جس میں میزبان نے اداکارہ سے پوچھا کہ وہ فردوس جمال کے بارے میں کیا کہیں گی تو ماہرہ نے محتاط انداز اپناتے ہوئے کہا کہ وہ انہیں نہیں جانتیں اس لیے کوئی تبصرہ نہیں کر سکتیں لیکن میزبان کے اصرار پر انہوں نے کہا کہ وہ بہت تجربہ کار اداکار ہیں۔
بالی ووڈ اداکار شاہ رخ خان کے حوالے سے بات کرتے ہوئے اداکارہ نے شکوہ کیا کہ لوگ ان پر الزام لگاتے ہیں کہ وہ ہر بار شاہ رخ خان پر بات کرتی ہیں لیکن درحقیقت ایسا نہیں ہے لوگ سوال کرتے ہیں تو وہ جواب دیتی ہیں، اس لیے وہ چاہتی ہیں کہ کوئی بھی ان سے شاہ رخ خان سے متعلق سوال نہ کرے۔
شاپنگ کرنے کے حوالے سے اپنے تجربات شیئر کرتے ہوئےماہرہ خان نے کہا کہ ایک دو بار وہ لاہور اور کراچی کے بازاروں میں برقع پہن کر گئی ہیں لیکن لوگ انہیں آواز سے پہچان لیتے ہیں اور پوچھتے ہیں آپ ماہرہ خان ہیں اس طرح بازار جانے کا پلان فیل ہو جاتاہے۔
یہ بھی پڑھیں: فردوس جمال کا متنازع بیان، ہمایوں سعید نے خاموشی توڑ دی
واضح رہے کہ پاکستانی شوبز انڈسٹری کے معروف اداکار فردوس جمال نے سُپر اسٹار ماہرہ خان کو ’بوڑھی عورت‘ قرار دیا تھا اور کہا تھا کہ اُنہیں ہیروئن کے نہیں بلکہ ماں کے کردار دینے چاہیے۔ میزبان نے اداکار سے کہا کہ پاکستان کے 90 فیصد لوگوں کو ماہرہ خان خوبصورت نظر آتی ہیں، جس پر فردوس جمال نے کہا کہ اگر 90 فیصد لوگ پاگل ہیں تو کیا وہ بھی اُن کی طرح پاگل بن جائیں۔
