نیویارک میں اقوام متحدہ کے ہیڈکوارٹر میں سعودی وزیر ثقافت، شہزادہ بدر بن عبد اللہ بن فرحان کی سرپرستی میں عالمی یوم عربی زبان 2024 کی تقریب شاندار انداز میں منعقد ہوئی۔
یہ بھی پڑھیں:سعودی عرب میں اقامہ گم ہو جانے کی صورت میں کیا کرنا چاہیے؟
اس اہم موقع پر کنگ سلمان گلوبل سینٹر فار عربک لینگویج نے (عربی زبان اور مصنوعی ذہانت: ورثے کے تحفظ کے ساتھ جدت کو فروغ دینا) کے موضوع کے تحت تقریب اور ایک منفرد نمائش کا اہتمام کیا، جس میں مختلف ممالک کے اعلیٰ سفارتی اور علمی شخصیات نے شرکت کی۔
تقریب کی افتتاحی تقریر کنگ سلمان گلوبل سینٹر کے سیکریٹری جنرل ڈاکٹر عبد اللہ الوشمی نے کی، جس میں انہوں نے عربی زبان کی تاریخ، ثقافتی اہمیت اور سعودی عرب کی اس کے فروغ کے لیے جاری کوششوں پر روشنی ڈالی۔
انہوں نے ویژن 2030 کے تحت عربی زبان کے فروغ کے لیے مرکز کے اقدامات، جیسا کہ تعلیم، ترجمہ، اور عالمی سطح پر اس کی پذیرائی کے حوالے سے جاری منصوبوں کا ذکر کیا۔
اقوام متحدہ میں سعودی مندوب ڈاکٹر عبد العزیز الواصل نے اپنے خطاب میں عربی زبان کو عالمی ورثے کا خزانہ قرار دیتے ہوئے اس کی ترقی اور جدید تقاضوں سے ہم آہنگی کے لیے مصنوعی ذہانت کے کردار پر زور دیا۔
انہوں نے کہا کہ عربی زبان نہ صرف ایک تاریخی زبان ہے بلکہ جدید ٹیکنالوجی کے ذریعے تخلیقی ترقی میں اہم کردار ادا کر سکتی ہے۔
تقریب میں (عربی زبان میں ترجمے) کے موضوع پر ایک مکالمہ بھی ہوا، جس میں بین الاقوامی ماہرین نے عربی زبان کے سفارتی اور ثقافتی پہلوؤں پر بات کی۔ اس کے علاوہ، اقوام متحدہ کے عملے کے لیے 3 روزہ ورچوئل تربیتی پروگرام کا انعقاد کیا گیا، جس کا مقصد سفارتی مقاصد کے لیے عربی ترجمے کی مہارتوں کو فروغ دینا تھا۔
تقریب کے دوران عربی زبان کی خوبصورتی اور ورثے کو اجاگر کرنے کے لیے ایک خصوصی نمائش بھی منعقد کی گئی، جس میں عربی زبان کی تاریخی اور ثقافتی جھلکیاں پیش کی گئیں۔
یہ تقریب سعودی عرب کی عربی زبان کے تحفظ اور اس کی بین الاقوامی سطح پر اہمیت کو اجاگر کرنے کی مسلسل کوششوں کی عکاسی کرتی ہے۔
کنگ سلمان گلوبل سینٹر فار عربک لینگویج کی یہ کاوش عربی زبان کو نہ صرف ماضی کی یادگار کے طور پر بلکہ مستقبل کی ترقی کا محور بنانے کی ایک منفرد مثال ہے۔
