وزیراعظم محمد شہباز شریف کی ہدایت پر نیشنل ڈیزاسٹر مینجمنٹ اتھارٹی اور وزارتِ خارجہ کا شام سے پاکستانی شہریوں کے انخلا کے لیے مشترکہ فلائیٹ آپریشن کے تحت شام سے انخلا کے بعد 318 پاکستانی شہریوں کو چارٹرڈ طیارے کے ذریعے بیروت، لبنان سے اسلام آباد پہنچا دیا گیا ہے۔
وزیراعظم محمد شہبازشریف نے پاکستانی شہریوں کی بحفاظت واپسی کو یقینی بنانے کے لیے فوری کارروائی پر متعلقہ حکام کو خراج تحسین پیش کیا۔ وزیر اعظم نے پاکستانیوں کی واپسی کے لیے گئے تمام اقدامات کی خود ذاتی طور پر نگرانی کی۔
وزیراعظم شہباز شریف نے شام سے پاکستانیوں کے بحفاظت انخلا کے حوالے سے لبنان کے وزیراعظم جناب نجیب میقاتی سے اظہار تشکر بھی کیا۔
مزید پڑھیں: شام میں پھنسے پاکستانی وطن روانہ
شام میں موجود 318 پاکستانی شہریوں کو، جن میں زائرین اور عملہ بھی شامل ہے، ایک چارٹرڈ طیارے کے ذریعے بیروت، لبنان سے اسلام آباد، پاکستان پہنچایا گیا ہے۔ شام میں پھنسے ان پاکستانی شہریوں کو ایک دن پہلے شام سے بیروت، لبنان تک بحفاظت لایا گیا تھا۔
وفاقی وزیر برائے منصوبہ بندی و خصوصی اقدامات پروفیسر احسن اقبال اور چیئرمین این ڈی ایم اے لییفٹینٹ جنرل انعام حیدر ملک کے حکام کے ہمراہ اسلام آباد انٹرنیشنل ایئرپورٹ پر مسافروں کا استقبال کیا۔ وزیراعظم محمد شہباز شریف نے کہا ہے کہ پاکستانی شہریوں کی شام سے بحفاظت وطن واپسی حکومت پاکستان کی اولین ترجیح ہے۔
وزیراعظم محمد شہباز شریف نے پاکستانی شہریوں کی بحفاظت واپسی کو یقینی بنانے کے لیے فوری کارروائی پر وزارت خارجہ، شام اور لبنان میں پاکستانی سفارتخانوں اور این ڈی ایم اے کے حکام کی تہہ دل سے تعریف کی۔
مزید پڑھیں: شام، بشارالاسد کے والد حافظ الاسد کا مقبرہ جلا دیا گیا
شام سے پاکستانیوں کے بحفاظت انخلا کے حوالے سے وزیراعظم نے لبنان کے وزیر اعظم جناب نجیب میقاتی کا بھی شکریہ ادا کیا جن کی حکومت نے بیروت کے راستے پاکستانیوں کی واپسی کے لیے ہر ممکن تعاون اور مدد فراہم کی۔حکومت کی جانب سے مسافروں کی منتقلی کے لیے بسوں کا بھی انتظام کیا گیا۔
وزیراعظم نے متعلقہ حکام کو شام سے مزید پاکستانی شہریوں کو نکالنے کے لیے فوری اقدامات جاری رکھنے کی ہدایت بھی کی ہے۔ وزیراعظم نے کہا ہے کہ حکومت اپنے شہریوں کی حفاظت اور بہبود کے لیے پرعزم ہے اور ان کے تحفظ کو یقینی بنانے کے لیے تمام ضروری اقدامات کرتی رہے گی۔
