پاکستان تحریک انصاف (پی ٹی آئی) کے بانی عمران خان نے کہا ہے کہ اگر ہمارے مطالبات تسلیم نہ کیے گئے تو اوورسیز پاکستانیوں کو ترسیلات زر وطن نہ بھیجنے کی اپیل کروں گا۔
بانی پی ٹی آئی عمران خان کی ہمشیرہ علیمہ خان نے اڈیالہ جیل میں عمران خان سے ملاقات کے بعد میڈیا سے گفتگو کی اور ان کا پیغام سامنے لایا۔
یہ بھی پڑھیں عمران خان نے مذاکرات کے لیے مزید وقت دےدیا، سول نافرمانی کی تحریک مؤخر
انہوں نے کہاکہ بانی پی ٹی آئی نے آج اپنا مطالبہ دہراتے ہوئے کہا کہ سپریم کورٹ کے 3 سینیئر ججوں پر مشتمل جوڈیشل کمیشن بنایا جائے، اور ہمارے بے گناہ لوگوں کو رہا کیا جائے۔
انہوں نے کہاکہ عمران خان کی جانب سے سول نافرمانی کی کال دینے کی صورت میں اوورسیز پاکستانی ترسیلات زر وطن نہیں بھیجیں گے اور وہ اس کے لیے تیار ہیں۔
انہوں نے کہاکہ ملک میں متنازعہ آئینی ترامیم کے ذریعے اس وقت حکمران سپریم کورٹ پر قابض ہیں، اور یہ سب سابق چیف جسٹس قاضی فائز عیسیٰ کی مہربانیوں سے ہوا۔
علیمہ خان نے کہاکہ پاکستان کے عوام معاشی مشکلات کا شکار ہیں، تحریک انصاف کی حکومت گرنے کے بعد لاکھوں لوگ خط غربت کی لکیر سے نیچے چلے گئے ہیں۔
انہوں نے کہاکہ عمران خان کے مطابق پی ٹی آئی کو کچلنے کا پلان لندن میں بنایا گیا، ایک منصوبے کے تحت 9 مئی کو 10 عمارتیں جلائی گئیں اور پھر 10 ہزار لوگوں کو گرفتار کرلیا گیا۔
انہوں نے کہاکہ 8 فروری کو ملک کے عوام نے پی ٹی آئی کے حق میں فیصلہ دیتے ہوئے بتادیا کہ وہ ظلم کے نظام کے خلاف کھڑے ہیں۔
یہ بھی پڑھیں امریکا نے عمران خان کی رہائی کے لیے دباؤ ڈالا تو حکومت سامنا کرےگی، رانا ثنااللہ
انہوں نے کہاکہ 26 نومبر کو بے گناہ لوگوں کا قتل عام کیا گیا، اونچی عمارتوں سے گولیاں چلائی گئیں، اسلام آباد احتجاج کے عینی شاہد موجود ہیں جو آنکھوں دیکھا حال بتا رہے ہیں۔
