حکومت اور پاکستان تحریک انصاف کے مابین جاری مذاکرات کا دوسرا دور آج اسپیکر ایاز صادق کی زیر صدارت پارلیمنٹ ہاؤس کے بند کمرے میں آج ساڑھے 3 بجے سہ پہر منعقد ہوگا۔
میڈیا رپورٹس کے مطابق پی ٹی آئی کی جانب سے اپنی مذاکراتی کمیٹی کے لیے چارٹرآف ڈیمانڈ مرتب کیا ہے جو حکومتی ٹیم کے سامنے پیش کیا جائے گا، کمیٹی نے بانی چیئرمین عمران خان کی ہدایت کو مد نظر رکھتے ہوئے اپنے مطالبات کی فہرست ترتیب دی ہے۔
یہ بھی پڑھیں:نواز شریف آن بورڈ، پی ٹی آئی کے ساتھ مذاکرات کو منطقی انجام تک پہنچانے کی کوشش کریں گے، رانا ثنااللہ
ذرائع کے مطابق مذاکرات کے دوسرے دور میں پی ٹی آئی کی ٹیم میں وزیراعلیٰ خیبرپختونخوا علی امین گنڈاپور بھی شامل ہوں گے، جو عمران خان سمیت دیگر سیاسی قیدیوں کی رہائی کا معاملہ اٹھائے گی۔
میڈیا رپورٹس کے مطابق پی ٹی آئی نے اپنے چارٹر آف ڈیمانڈ میں تمام سیاسی قیدیوں کی رہائی سمیت 9 مئی اور 26 نومبر کے واقعات پر عدالتی کمیشن تشکیل دینے پر زور دے گی۔
مزید پڑھیں: پی ٹی آئی نے مذاکرات میں حکومت سے کیا مطالبہ کیا؟ عرفان صدیقی نے بتادیا
مذاکراتی اجلاس کے اس دوسرے دور میں پی ٹی آئی کے تمام کمیٹی اراکین شریک ہوں گے، حکومت چارٹر آف ڈیمانڈ کی روشنی میں اپنا لائحہ عمل مرتب دے گی۔
واضح رہے کہ حکومت اور پی ٹی آئی کے درمیان مذاکرات کا پہلا دور 23 دسمبر کو قومی اسمبلی کے اسپیکر ایاز صادق کی ثالثی میں منعقد ہوا تھا، جس میں فریقین کی جانب سے مذاکرات جاری رکھنے پر اتفاق کرتے ہوئے مذاکرات کی اگلی بیٹھک 2 جنوری کو طے کی تھی۔
