قومی اسمبلی میں اپوزیشن لیڈر عمر ایوب کا کہنا ہے کہ حکومت سے مذاکرات کے بارے میں ان کا واضح بیانیہ ہے کہ بانی پی ٹی آئی عمران خان اور شاہ محمود قریشی سمیت دیگر اسیروں کو رہا کیا جائے۔
اسلام آباد کی ضلعی عدالت میں پیشی کے موقع پر میڈیا سے گفتگو کرتے ہوئے عمر ایوب کا موقف تھا کہ مذاکرات کے بارے میں گزشتہ روز ان کا بہت واضح بیانیہ تھا۔
یہ بھی پڑھیں:قوانین کو ہتھیار بنایا جارہا ہے جس کا نشانہ صرف عمران خان ہیں، عمر ایوب
’عمران خان، شاہ محمود قریشی اور دیگر اسیران کی رہائی ہمارا پوائنٹ ہے، دوسرے نمبر پر 9 مئی اور 26 نومبر کے ضمن میں کمیشن کے قیام کا مطالبہ ہے۔‘
انہوں نے کہا کہ حکومتی ٹیم کو بتایا ہے اور یہ بھی کہا ہے کہ بانی پی ٹی آئی سے ہماری ملاقات ہونی چاہیے، حکومت نے بانی پی ٹی آئی کو غیر قانونی طور پر جیل میں رکھا ہوا ہے۔
’ہم شروع سے کہہ رہے ہیں کہ قانون کے مطابق کام نہیں ہوگا تو پھر سرمایہ کاری نہیں ہوگی اور لاقانونیت ہوگی۔۔۔ اناج غائب ہوگیا ہے، سردیوں میں لوڈشیڈنگ ہورہی ہے۔‘
مزید پڑھیں:فوجی عدالتوں سے سزا سپریم کورٹ کے اختیارات سے تجاوز ہے، عمر ایوب خان
اس سے قبل اسلام آباد کی ڈسٹرکٹ سیشن کورٹ نے 26 نومبر کو ڈی چوک پر احتجاج میں شرکت کیخلاف درج مقدمہ میں عمر ایوب کی عبوری ضمانت میں 9 جنوری تک توسیع کردی ہے۔
اسلام آباد کے تھانہ کورال میں درج مقدمے میں عمر ایوب ایڈیشنل سیشن جج راجہ آصف کی عدالت میں اپنے وکیل بابر اعوان کے ہمراہ پیش ہوئے، جہاں تفتیشی آفیسر کے رخصت پر ہونے کی وجہ سے ریکارڈ پیش نہیں کیا جا سکا۔
