وفاقی وزیر برائے منصوبہ بندی احسن اقبال نے کہا ہے کہ وزیراعظم نے سستی بجلی کے لیے انرجی سیکٹرز میں ریفارمز کا بڑا پیکیج منظور کیا ہے جس پر کام جاری ہے۔
یہ بھی پڑھیں: بس بہت ہوگیا، اب پاکستان کی ترقی میں کوئی رکاوٹ برداشت نہیں کریں گے، احسن اقبال
اسلام آباد میں پریس کانفرنس کرتے ہوئے وفاقی وزیر احسن اقبال نے کہا کہ ملک کو مہنگی بجلی کا سامنا ہے، اس کی بڑی وجہ ہمارے سسٹم میں صلاحیت کا نہ ہونا ہے، وزیراعظم شہباز شریف نے انرجی سیکٹر میں ریفامرز کے لیے ایک پورا پیکیج منظور کیا ہے جس پر وزارت توانائی کام کررہی ہے، ساتھ ہی گرین انرجی پر بھی کام جاری ہے، جس میں سولر انرجی، ہائیڈرل انرجی، ونڈ اور نیوکلیئر انرجی کے منصوبے شامل ہیں۔
احسن اقبال نے کہا کہ ملکی تاریخ کے سب سے بڑے نیوکلیئرپاور پلانٹ کا وزیراعظم افتتاح کرچکے ہیں، یہ چین کے اشتراک سے بڑا منصوبہ ہے جو ہمیں گرین انرجی دے گا،ہائیڈرل انرجی کے جاری منصوبوں سے بھی ہمیں گرین انرجی پر منتقل ہونے میں بڑی مدد ملے گی۔
مزید پڑھیں: قومی پیداواریت، معیار اور جدت سمٹ 2024 کا انعقاد، احسن اقبال کا افتتاحی خطاب
انہوں نے کہا کہ ہماری اپنے آپ سے کمٹمنٹ ہے کہ ہم اپنے ملک سے غربت ختم کریں گے، بھوک، جہالت، بیماری ختم کریں گے، لوگوں کو بہتر مواقع دینے ہیں، ناہمواری ختم کرنی ہے اور خاص طور پر خواتین اور نوجوانوں کو ترقی کے مواقع دینے ہیں، جس پر ہم صوبوں کے ساتھ مل کر کام کریں گے۔
