اسلام آباد پولیس نے فرائض کی انجام دہی میں غفلت برتنے اور جرائم کو کنٹرول نہ کرنے پر 4 تھانوں کے ایس ایچ اوز کو سزائیں دی ہیں۔
ڈی آئی جی اسلام آباد سید علی رضا کے حکم پر ایس ایچ او تھانہ نون کی 3 سال سروس ضبطی اور ایک سال کی پروموشن روک دی گئی ہے جب کہ ایس ایچ او تھانہ شمس کالونی، ایس ایچ او تھانہ سبزی منڈی اور ایس ایچ او تھانہ سیکرٹریٹ کو 2، 2 سال سروس ضبطی کی سزائیں دی گئیں۔
اس کے علاوہ اسلام آباد پولیس نے رشوت کی شکایت پر ڈولفن کے ایک اہلکار کو نوکری سے برخاست کردیا ہے۔
یہ بھی پڑھیے:اسلام آباد پولیس کے افسران اور جوان پولنگ اسٹیشنز پر تعینات
ڈی آئی جی اسلام آباد سید علی رضا نے کہا ہے کہ کرپشن کرنے والے افسران کی محکمہ میں کوئی گنجائش نہیں۔ ان کا کہنا تھا کہ اسلام آباد پولیس خود احتسابی کے عمل پر عمل پیرا ہے اور کوئی بھی شخص قانون سے بالا تر نہیں۔
ڈی آئی جی کا کہنا ہے کہ جو بھی پولیس افسر اختیارات سے تجاوز اور ڈیوٹی میں غفلت برتے گا سخت قانونی و محکمانہ کارروائی کا سامنا کرے گا۔
