محکمہ تعلیم سندھ کی جانب سے نجی اسکولوں کے طلبا سے ایڈوانس اضافی فیس نہ لینے کی ہدایت جاری کردی ہے، وزیر تعلیم سندھ سید سردارعلی شاہ کی ہدایت پر ڈائریکٹوریٹ آف انسپیکشن اینڈ پرائیویٹ انسٹیٹیوشن سندھ نے سرکولر جاری کردیا ہے۔
یہ بھی پڑھیں: پاکستان بھر میں انٹرمیڈیٹ امتحانات کی فیسوں میں ہوشربا اضافہ
ڈائریکٹوریٹ آف انسپیکشن اینڈ پرائیویٹ انسٹیٹیوشن کے جاری سرکولر کے مطابق اسٹیرنگ کمیٹی نے فیصلہ کیا ہے کہ تعلیمی سال 26- 2025 یکم اپریل 2025 سے شروع ہوگا، والدین اور طلبا کی سہولت اور انہیں مالی مشکلات سے بچانے کے لیے میٹرک کے طلبا سے ٹیوشن فیس صرف اپریل کے مہینے تک وصول کی جائے گی، پری پرائمری سے 9ویں جماعت اور وہ طلبا جو 9ویں کلاس سے دسویں کلاس میں پروموٹ ہوئے ہیں، ان سے جون اور جولائی کی فیس اپریل اور مئی کے مہینوں میں وصول کی جاسکتی ہے۔
سرکولر میں یہ بھی واضع کیا گیا ہے کہ ہر ماہ کے الگ الگ فیس واؤچرز طلبا کو جاری کیے جائیں، جون کے فیس واچرز 30 جون تک جبکہ جولائی کی فیس واؤچرز 31 جولائی تک قابل ادا ہوں گے۔
کراچی نجی اسکولز فیڈریشن کے صدر انجینئر منورحمید کا کہنا ہے کہ تین سال قبل منسٹری آف ایجوکیشن کی جانب سے ایک نوٹیفیکشن جاری کیا گیا تھا جس کے تحت نجی اسکولز جون کی فیس جون جبکہ جولائی کی جولائی میں لیں گے، اس سے قبل نجی اسکولز جون کی فیس جنوری جبکہ فروری میں جولائی کی فیس لے لیا کرتے تھے۔
منور حمید کے مطابق جنوری اور فروری میں جون، جولائی کی فیس کی وجہ یہ تھی کہ جون، جولائی میں اسکولوں کی چھٹیوں کے باعث اسکول کے اخراجات پورے کرنے کے لیے مالی بحران کا سامنا رہتا ہے جس کی وجہ سے اسکولوں کی جانب سے یہ راستہ اختیار کیا گیا لیکن وزیر تعلیم کی اس نوٹیفیکشن کے بعد اسکولوں نے اس پر عملدرآمد تو کیا لیکن مشکلات درپیش آئیں۔
ان کا کہنا تھا کہ اس سال ڈائریکٹوریٹ ایجوکیشن کی جانب سے ایک نوٹیفیکشن جاری کیا گیا ہے جس کے تحت اپریل میں جون کے فیس واؤچر جاری کیا جاسکتا ہے جس کی آخری تاریخ 30 جون تک ہوگی، ایسے ہی مئی میں جولائی کا فیس واؤچر جاری کیا جاسکتا ہے جس کی آخری تاریخ 31 جولائی ہوگی۔
یہ بھی پڑھیں: اسلام آباد کا ایک سرکاری اسکول جو پرائیویٹ اسکولوں سے کسی طرح کم نہیں
ان کا کہنا تھا کہ یہ اچھا اقدام ہے اس سے اسکول انتظامیہ کے لیے بھی اور والدین کے لیے بھی آسانی ہوجائے گی۔
