انٹرنیشنل کرکٹ کونسل (آئی سی سی ) نے اتوار کو مزید 4 کیٹیگریز میں سالانہ ایوارڈز کا اعلان کردیا ہے، جس کے مطابق سری لنکا کے ابھرتے ہوئے بیٹر کامندو مینڈس ’ایمرجنگ پلیئر آف دی ایئر‘ جبکہ رچرڈ النگ ورتھ’امپائر آف دی ایئر 2024 کا ایوارڈ لے اڑے، ان کا تعلق انگلینڈ سے ہے۔
یہ بھی پڑھیں:آئی سی سی پلیئر آف دی منتھ نامزدگیوں کا اعلان، کوئی پاکستانی کرکٹر شامل نہیں
انٹرنیشنل کرکٹ کونسل (آئی سی سی) نے سالانہ ایوارڈز کے اعلانات کا سلسلہ جاری رکھا ہوا ہے جس کے مطابق اتوار کو اس نے مزید 4 کیٹیگریز میں ایوارڈز کا اعلان کیا ہے۔
آئی سی سی کے اعلان کے مطابق سری لنکا کے مایہ ناز بیٹر کامندو مینڈس کو ایمرجنگ پلیئرآف دی ائیر کے ایوارڈ سے نوازا کیا گیا ہے، کیونکہ کامندو مینڈس نے سال 2024 میں 9 ٹیسٹ میچ کھیل کر 1047 انفرادی رنز اسکور کیے ہیں۔
آل راؤنڈر کیٹیگری میں آئی سی سی نے نمیبیا کے آل راؤنڈر گیرہارڈ ایرسمس کو ایسوسی ایٹ پلیئر آف دی ایئر کا ایوارڈ دیا ہے، گیرہارڈ ایرسمس نے سال 2024 میں 25 میچز کھیل کر 727 رنز اسکور کیے اور 36 وکٹیں بھی حاصل کی ہیں۔
مزید پڑھیں:بھارتی فاسٹ بولر جسپریت بمراہ آئی سی سی پلیئر آف دی منتھ قرار
ادھر سال 2024 کے بہترین امپائر کا ایوارڈ انگلینڈ کے رچرڈ النگ ورتھ کو دیا گیا ہے اسی طرح ویمن ایسوسی ایٹ پلیئر آف دی ایئر کا ایوارڈ متحدہ عرب امارات ( یواے ای) کی کپتان ایشا اوزا کو دیا گیا ہے۔ خواتین کی کیٹیگری میں ایمرجنگ کرکٹر آف دی ایئر کا ایوارڈ اینری ڈرکسن کو دیا گیا ہے۔
اسی طرح آئی سی سی مینز ٹی 20 کرکٹر آف دی ایئر کا ایوارڈ ارشدیپ سنگھ جبکہ آئی سی سی ویمنز ٹی ٹونٹی کرکٹر آف دی ایئر کا ایوارڈ میلی کیر کو دیا گیا ہے۔
مزید کیٹیگریز میں ایوارڈ کے اعلان کا شیڈول
پیر 27 جنوری کو آئی سی سی سال کے بہترین ون ڈے کرکٹر، آئی سی سی ویمنز ون ڈے کرکٹر آف دی ایئر اور آئی سی سی مینز ٹیسٹ کرکٹر آف دی ایئر کا اعلان کیا جائے گا۔
یہ بھی پڑھیں:آئی سی سی نے ٹیسٹ اور ٹی20 کی نئی رینکنگ جاری کردی، بابر اعظم کی ترقی
اسی طرح منگل 28 جنوری کو آئی سی سی ویمن کرکٹر آف دی ایئر کے لیے ریچل ہیہو فلنٹ ٹرافی اور سرگارفیلڈ سوبرز ٹرافی برائے آئی سی سی مینز کرکٹر آف دی ایئر کا اعلان کیا جائے گا۔
