چیمپیئنز ٹرافی کے اہم میچ میں پاکستان کو بھارت سے شکست پر شائقین کرکٹ شدید مایوس ہیں اور ٹیم سمیت پاکستان کرکٹ بورڈ پر بھی تنقید کی جارہی ہے، ایسے میں گورنر سندھ کامران ٹیسوری بھی سامنے آگئے اور لب کشائی کی ہے۔
یہ بھی پڑھیں چیمپیئنز ٹرافی کا بڑا ٹاکرا: بھارت نے پاکستان کو 6 وکٹوں سے شکست دیدی
اپنے ایک بیان میں کامران ٹیسوری نے چیئرمین پی سی بی محسن نقوی سے شکوہ کرتے ہوئے کہاکہ آپ نے جیسے اسٹیڈیم بنائے ہیں ویسی ٹیم بھی بناتے۔
انہوں نے کہاکہ اب آئی ایم ایف کی قسط لینا تو آسان ہے لیکن قومی ٹیم کا ٹورنامنٹ کے اگلے مرحلے کے لیے کوالیفائی کرنا مشکل ہوگا۔
گورنر سندھ نے کہاکہ جب قومی ٹیم کی بیٹنگ لائن لڑکھڑائی اور بولرز کپکپائے تو یہ دیکھ کر سارا مزہ ہی کرکرا ہوگیا۔
کامران ٹیسوری نے مزید کہاکہ قومی ٹیم میں بہترین صلاحیت کے حامل بلے بازوں اور جان لڑانے والے فیلڈرز کی ضرورت ہے۔ ایک بار اعلیٰ ترین معیار رکھ کر ٹیم بنالی جائے تو پھر شائقین کرکٹ کو مایوسی نہیں ہوگی۔
یہ بھی پڑھیں چیمپیئنز ٹرافی: کیا 2 میچ ہارنے کے بعد اب بھی پاکستان اگلے راؤنڈ تک جا سکتا ہے؟
واضح رہے کہ گورنر سندھ کامران ٹیسوری نے بھارت سے میچ جیتنے کی صورت میں ٹیم کے لیے ایک کروڑ روپے کا اعلان کیا تھا۔
