پاکستان تحریک انصاف (پی ٹی آئی) نے حکومت کے ساتھ مذاکرات کے لیے تین رکنی کمیٹی تشکیل دے دی۔
پی ٹی آئی کی تین رکنی مذاکرات کمیٹی پارٹی کے وائس چیئرمین مخدوم شاہ محمود قریشی، سینیئر نائب صدر فواد حسین چوہدری اور سینیٹر علی ظفر پر مشتمل ہے۔
یاد رہے کہ امیر جماعت اسلامی سراج الحق نے قومی انتخابات پر اتفاق رائے پیدا کرنے کے لیے پارلیمانی پارٹیوں سے رابطے شروع کیے تھے۔ اس موقع پر ان کا کہنا تھا کہ ’اس سے پہلے کہ کوئی میرے ہم وطنو کہنے والا آ جائے، سیاستدان مل بیٹھیں اور پورے ملک میں انتخابات کی ایک تاریخ پر متفق ہو جائیں۔‘
بعد ازاں سراج الحق نے وزیراعظم میاں محمد شہباز شریف اور پی ٹی آئی چیئرمین و سابق وزیراعظم عمران خان سے ملاقاتیں بھی کی تھیں۔
سراج الحق کے بعد پاکستان پیپلز پارٹی نے بھی حکومت اور پی ٹی آئی کے مابین مذاکرات پر زور دیا تھا۔ اس بات کے لیے جمعیت علما اسلام کے سربراہ اور حکمراں اتحاد کے سربراہ مولانا فضل الرحمان تیار نہیں تھے جس پر پیپلز پارٹی کے چیئرمین اور وزیر داخلہ بلاول بھٹو ان کی رہائش گاہ واقع ڈیرہ اسماعیل خان بھی گئے تھے تاہم انہوں نے اس وقت آمادگی کا اظہار نہیں کیا تھا۔
علاوہ ازیں سپریم کورٹ نے بھی انتخابات کے حوالے سے کیس کی سماعت کے دوران ریمارکس دیے تھے کہ اگر سیاسی جماعتیں ایک پیج پر آجائیں تو عدالت کوئی گنجائش نکال سکتی ہے ورنہ پنجاب میں انتخابات 14 مئی کو ہی ہوں گے۔
