کافی عرصے تک منظر عام سے غائب رہنے والی ہالی ووڈ اداکارہ انجلینا جولی کی اچانک وائٹ ہاؤس کے ایک عشائیے میں شرکت مداحوں کے لیے کسی سرپرائز سے کم نہیں ہے۔
غیر ملکی میڈیا کے مطابق امریکی صدر جوبائیڈن اور انکی اہلیہ کی جانب سے اپنے جنوبی کوریا کے ہم منصب کے لیے وائٹ ہاؤس میں ایک عشائیے کا اہتمام کیا گیا جہاں ہالی ووڈ اداکارہ انجلینا جولی کو بھی مدعو کیا گیا۔
ہالی ووڈ کی خوبرو اداکارہ انجلینا جولی نے اپنے بیٹے میڈاکس کے ہمراہ عشائیے میں شرکت کی۔ عشائیے میں شرکت کے دوران لی گئی تصاویر میں دیکھا جا سکتا ہے کہ منظر عام سے غائب رہنے والی اداکارہ انجلینا جولی سفید لباس میں ملبوس ہیں اور انتہائی دلکش دکھائی دے رہی ہیں۔
ایک اور تصویر میں دیکھا جا سکتا ہے کہ انجلینا جولی اپنے بیٹے کے ہمراہ موسیقی سے محظوظ ہو رہی ہیں اور انتہائی خوش دکھائی دے رہی ہیں۔
میڈیا رپورٹس کے مطابق عشائیے کے دوران غیر رسمی گفتگو میں انجلینا جولی کا کہنا تھا کہ انکے لیے امریکا اور ایشیا کے مضبوط تعلقات بہت معنی رکھتے ہیں۔ انجلینا جولی اور ان کے بیٹے کے اس خطے خاص کر جنوبی کوریا کے ساتھ قریبی تعلقات ہیں۔
