سیف سٹی اسلام آباد سی سی ٹی وی اینڈ نیٹ ورک ٹیکنیشن کورس کا انعقاد کرنے جا رہا ہے، وفاقی دارالحکومت اسلام آباد کا ہر شہری اس کورس کا حصہ بن سکتا ہے، عمر یا تعلیم کی کوئی قید نہیں ہے، کورس کا دورانیہ 2 ہفتوں پر محیط ہوگا۔
یہ بھی پڑھیں: اسلام آباد سیف سٹی سسٹم پر ہیکرز کا حملہ، حساس نوعیت کا ڈیٹا چوری
سیف سٹی اسلام آباد کے مطابق اس کورس میں کیمرہ جات اور مختلف آلات کا استعمال کرتے ہوئے تمام قسم کی سرگرمیوں کی نگرانی کے ساتھ ساتھ ان کا ریکارڈ رکھنا سکھایا جائے گا، عوامی اور نجی جگہوں پر سیکیورٹی، حفاظت اور ہر قسم کے حالات سے متعلق آگاہی فراہم کی جائے گی۔
اینالاگ، آئی پی، پی ٹی زی اور تھرمل کیمرہ جات کی تنصیب اور خرابی کی صورت میں مرمت کا طریقہ کار بھی اس میں شامل ہو گا، اس کے علاوہ ڈی وی آر، این وی آر اور کلاؤڈ اسٹوریج ڈیوائسز پر ڈیٹا اسٹور ہونے نیز بیک اپ ریکارڈنگ کی اپگریڈیشن بھی سکھائی جائے گی۔
یہ بھی پڑھیں: وزارت داخلہ کا اسلام آباد اور لاہور کی طرز پر داسو، چلاس میں سیف سٹی پراجیکٹ شروع کرنے کا فیصلہ
نیٹ ورکنگ کا سامان جیسا کہ راؤٹرز، سوئچز، فائبر آپٹکس کی تنصیب اور کسی بھی قسم کی خرابی کی صورت میں مرمت کا طریقہ کار بھی اس میں شامل ہو گا، موبائل ایپس کے ذریعے مانیٹرنگ کے نظام کو دکھایا جائے گا، کورس کے اختتام پر شرکامیں اسناد تقسیم کی جائیں گی۔
