وزیراعظم محمد شہباز شریف نے بیلاروس کے اپنے حالیہ دورے کے بعد پاکستان کے ہنرمند نوجوانوں کے لیے بڑی خوشخبری کا اعلان کردیا ہے۔
ایسوسی ایٹڈ پریس آف پاکستان (اے پی) کے مطابق وزیراعظم نے کہا ہے کہ بیلاروس نے ڈیڑھ لاکھ پاکستانیوں کو ملازمتیں دینے کا اعلان کیا ہے۔
انہوں نے اس اعلان کو بیلاروس کی جانب سے پاکستانیوں کے لیے ایک تحفہ قرار دیتے ہوئے کہا کہ اس سے نہ صرف بیلاروس کی معیشت کو فائدہ ہوگا بلکہ باہنر پاکستانی نوجوانوں کو باعزت روزگار کے مواقع بھی میسر آئیں گے۔
یہ بھی پڑھیے: نوازشریف اور بیلاروس کے صدر کے مابین پرتپاک ملاقات، اپنے بھائی سے ملاقات پر خوش ہوں، لوکا شینکو
بیلاروس کے صدر الیگزینڈر لوکاشینکو کے ہمراہ پریس کانفرنس کرتے ہوئے انہوں نے کہا کہ پاکستان سے یہ باصلاحیت افرادی قوت، جنہیں بین الاقوامی اور ملکی معیار کے مطابق سرٹیفائیڈ کیا جائے گا، بیلاروس کے لیے قیمتی اثاثہ ثابت ہوگی۔
اس کے علاوہ دونوں ممالک کے وفود نے دورے کے دوران زراعت اور دفاع سمیت مختلف شعبوں میں تعاون اور تجارت بڑھانے پر بھی اتفاق کیا۔
بیلا روس کے صدر لوکا شینکو نے پاکستانی وزیراعظم کے دورہ بیلاروس پر ان کا خیرمقدم کرتے ہوئے کہا کہ بیلا روس پاکستان کے ساتھ تعلقات کو بہت اہمیت دیتا ہے۔ دونوں ممالک کے مابین مختلف شعبوں میں تعاون کے وسیع مواقع موجود ہیں۔ انہوں نے کہا کہ پاکستان بیلا روس بزنس فورم کا انعقاد تجارت کے فروغ کے لیے اہمیت کا حامل ہے۔
