پاکستان نے مطالبہ کیا ہے کہ کوئی تیسرا غیرجانبدار ملک پہلگام اور جعفرایکسریس سانحات کی انکوائری کرے، ہم بھارت کے دہشتگردی میں ملوث ہونے کے شواہد پیش کریں گے۔
لاہور میں پریس کانفرنس کرتے ہوئے وفاقی وزیر داخلہ محسن نقوی نے کہاکہ پاکستان کا پہلگام واقعہ سے کوئی تعلق نہیں، ہمارے پاس ثبوت موجود ہیں کہ ہندوستان ہمارے ملک میں ہونے والی دہشتگردی میں ملوث ہے۔
یہ بھی پڑھیں میزائل چوکوں میں سجانے کیلئے نہیں، پانی بند کرو گے تو آپ کا سانس بند کردیں گے، پاکستان کا بھارت کو دوٹوک پیغام
In light of the recent incident, Pakistan officially demands a transparent and impartial investigation to check the facts surrounding the Indian attack. Given the current situation and historical context, Pakistan has serious reservations regarding India’s credibility in…
— Mohsin Naqvi (@MohsinnaqviC42) April 26, 2025
انہوں نے کہاکہ ہم نے تین روز میں 7 آئی ای ڈیز حملوں کی منصوبہ بندی ناکام بنائی ہے، بھارت مختلف شہروں میں تخریب کاری کی منصوبہ بندی کررہا تھا۔
محسن نقوی نے کہاکہ دنیا کے کسی بھی کونے میں دہشتگردی ہو مذمت کرتے ہیں، لیکن سوال یہ پیدا ہوتا ہے کہ کیا کبھی بھارت نے پاکستان میں ہونے والی دہشتگردی کی مذمت کی۔
انہوں نے کہاکہ پاکستان کی معاشی ترقی بھارت کو ہضم نہیں ہورہی، بھارت میں جب بھی کوئی غیرملکی مہمان آتا ہے تو ایسا واقعہ رونما ہو جاتا ہے۔
وزیر داخلہ نے کہاکہ پاکستان اپنی سالمیت پر کوئی سمجھوتا نہیں کرےگا، ہماری پوری قوم لڑنے کے لیے تیار ہے۔
انہوں نے کہاکہ بی ایل اے اور ’را‘ ایک ہی نام ہے، ہمیں سب معلوم ہے کہ بلوچ لبریشن آرمی کے لوگ کس ملک میں جاکر کس کو مل رہے ہیں۔
محسن نقوی نے کہاکہ اگر بھارت نے ہمارے کسی ایک حق کو بھی روکنے کی کوشش کی تو ہم لڑیں گے، اب دنیا پر ہے کہ ہماری انکوائری کی پیشکش کو کیسے لیا جاتا ہے۔
ایک سوال کے جواب میں انہوں نے کہاکہ پاکستان مسئلہ کشمیر پر اپنے مؤقف سے پیچھے نہیں ہٹے گا، بھارت ہمارے خلاف ایک قدم بڑھائے گا تو ہم دو قدم آگے بڑھ کر جواب دیں گے۔
یہ بھی پڑھیں امن کی خواہش کو کمزوری نہ سمجھا جائے، وزیراعظم
واضح رہے کہ دو روز قبل ہندوستان نے پہلگام واقعہ کو بنیاد بنا کر سندھ طاس معاہدہ معطل کرنے کا اعلان کرتے ہوئے پاکستانی شہریوں کو ملک چھوڑنے کا حکم دیا تھا، جس کے جواب میں پاکستان نے بھی دوٹوک جواب دیتے ہوئے کہا تھا کہ اگر ہمارا پانی بند کیا گیا تو جنگ ہوگی، جس کے لیے تیار ہیں۔
