پہلگام حملے کے بعد جنگی جنون میں مبتلا بھارت نے ایک بار پھر پاکستان کو بغیر کسی ثبوت کے مورد الزام ٹھہرا کر خطے میں کشیدگی کو ہوا دینا شروع کردی۔ بھارت کسی بھی وقت پاکستان کے خلاف فوجی کارروائی کی حماقت کرسکتا ہے۔ تاہم، پاکستانی مسلح افواج دشمن کی ہر مہم جوئی کا دندان شکن جواب دینے کے لیے مکمل طور پر تیار ہیں۔
مستند ذرائع کے مطابق، بھارتی افواج کی لائن آف کنٹرول (ایل او سی) اور مقبوضہ کشمیر کے اطراف غیر معمولی نقل و حرکت دیکھی گئی ہے، جبکہ سرحدی علاقوں میں دیہات خالی کرانے کا عمل تیز تر ہو چکا ہے۔
ذرائع کا کہنا ہے کہ بھارتی فوج نے سامبا، کٹھوعہ، اور اکھنور سیکٹرز میں بڑے پیمانے پر مقامی آبادی کو محفوظ مقامات پر منتقل ہونے کے احکامات دیئے ہیں۔ اس سے قبل اٹاری سیکٹر میں بھی گردواروں سے اعلانات کروا کر کسانوں کو فصلوں کی فوری کٹائی کی ہدایات دی گئی تھیں، جسے ماہرین جنگی تیاریوں کا پیش خیمہ قرار دے رہے ہیں۔
مزید پڑھیں: پہلگام فالس فلیگ آپریشن: بھارتی جنگی جنون کے باعث مقبوضہ کشمیر کے عوام ظلم و جبر کا شکار
دفاعی اور انٹیلی جنس ذرائع کا کہنا ہے کہ بھارت کسی بھی وقت پاکستان کے خلاف فوجی کارروائی کی حماقت کرسکتا ہے۔ تاہم، پاکستانی مسلح افواج دشمن کی ہر مہم جوئی کا دندان شکن جواب دینے کے لیے مکمل طور پر تیار ہیں۔ پاکستان کی بری، بحری اور فضائی افواج کو الرٹ کر دیا گیا ہے، اور کسی بھی بھارتی جارحیت کا بھرپور دفاع کیا جائے گا۔
ذرائع نے مزید بتایا کہ مودی سرکار کے جنگی جنون نے نہ صرف خطے کے امن کو خطرے میں ڈال دیا ہے بلکہ کشمیری مسلمانوں کے لیے بھی زندگی کو اجیرن بنا دیا ہے۔ مقبوضہ کشمیر میں پہلگام حملے کو جواز بنا کر مسلمانوں کے خلاف بڑے پیمانے پر کریک ڈاؤن جاری ہے۔ گھروں پر چھاپے، نوجوانوں کی گرفتاری، اور ذرائع مواصلات کی بندش معمول بنتی جا رہی ہے۔
بین الاقوامی سطح پر اس صورتحال پر گہری تشویش کا اظہار کیا جا رہا ہے۔ عالمی مبصرین اور انسانی حقوق کی تنظیمیں بھارتی عزائم کو علاقائی سلامتی کے لیے خطرہ قرار دے رہی ہیں۔ ادھر بھارت نے ہندوتوا پروپیگنڈے کے تحت پاکستان کے سینکڑوں نیوز چینلز کو بھی بلاک کروا دیا ہے تاکہ بھارتی عوام کو یکطرفہ بیانیے کے ذریعے گمراہ کیا جا سکے۔
مزید پڑھیں: پہلگام واقعہ: پاکستان کے خلاف مہم جوئی سے انکار پر بھارتی فوج کے جنرل کی چھٹی
دفاعی ماہرین کا کہنا ہے کہ بھارتی حکومت کی جانب سے میڈیا اور عوام کو حقائق سے دور رکھنا ایک منظم مہم کا حصہ ہے جس کا مقصد داخلی ناکامیوں سے توجہ ہٹانا اور انتہا پسند ووٹرز کو خوش کرنا ہے۔
پاکستانی عوام اور مسلح افواج یک زبان اور یکجان ہو کر ملکی خود مختاری، علاقائی سالمیت اور قومی غیرت کے تحفظ کے لیے ہر سطح پر دفاع کے لیے تیار ہیں۔ عسکری ذرائع کا کہنا ہے کہ اگر بھارت نے کوئی مہم جوئی کی تو اسے ایسی عبرتناک شکست دی جائے گی جو تاریخ میں لکھی جائے گی۔
