وزیراعلیٰ بلوچستان میر سرفراز بگٹی نے ضلع ڈیرہ بگٹی کے علاقے سوئی کا ایک روزہ دورہ کیا، جہاں انہوں نے سوئی تا کشمور روڈ کے تعمیراتی منصوبے کا باقاعدہ افتتاح کیا۔ منصوبے پر پراجیکٹ ڈائریکٹر نے وزیراعلیٰ کو تفصیلی بریفنگ دی۔
بریفنگ کے مطابق یہ منصوبہ 9351 ملین روپے کی لاگت سے مکمل کیا جائے گا اور یہ ڈیرہ بگٹی کے عوام کے لیے ایک تاریخی سنگ میل کی حیثیت رکھتا ہے کیونکہ 28 سال بعد کسی بڑے مواصلاتی منصوبے کا آغاز ہوا ہے۔
مزید پڑھیں: سرفراز بگٹی کا بھارت کو فنٹاسٹک ٹی کا طعنہ، اس بار مختلف تواضع کی دھمکی
افتتاح کے موقع پر وزیراعلیٰ سرفراز بگٹی نے کہا کہ اس منصوبے سے ذرائع آمد و رفت میں نمایاں بہتری آئے گی، جس کے مثبت اثرات مقامی معیشت پر بھی پڑیں گے۔ انہوں نے کہا کہ سڑک کی تعمیر سے نہ صرف مقامی ترقی کی راہ ہموار ہوگی بلکہ کسانوں کو منڈیوں تک رسائی میں بھی سہولت حاصل ہو گی۔
وزیراعلیٰ بلوچستان کا کہنا تھا کہ پسماندہ علاقوں کی ترقی حکومت کی اولین ترجیح ہے اور یہ منصوبہ دور دراز علاقوں کو قومی دھارے سے جوڑنے میں اہم کردار ادا کرے گا۔
