وزیراعلیٰ خیبرپختونخوا علی امین گنڈا پور نے ایک بیان میں کہا ہے کہ حکومت خیبر پختونخوا بھارت کی جانب سے پاکستان پر کی گئی بلااشتعال اور غیر قانونی فوجی جارحیت کی شدید مذمت کرتی ہے۔
ان کا کہنا ہے کہ یہ اقدام بین الاقوامی قوانین کی کھلی خلاف ورزی ہے اور خطے میں امن و استحکام کے لیے سنگین خطرہ ہے۔
علی امین گنڈاپور کے مطابق ہم حکومت پاکستان اور افواجِ پاکستان کے ساتھ مکمل یکجہتی اور غیر متزلزل حمایت کا اظہار کرتے ہیں، اور اس نازک گھڑی میں قومی سلامتی اور خودمختاری کے دفاع کے لیے ان کے شانہ بشانہ کھڑے ہیں۔
انہوں نے کہا ہے کہ ہم ملک کے اُن علاقوں اور عوام کے ساتھ مکمل ہمدردی کا اظہار کرتے ہیں جو اس جارحیت سے متاثر ہوئے۔
انہوں نے کہا کہ حکومت خیبر پختونخوا، بین الصوبائی یکجہتی کے جذبے کے تحت، ہر ممکن تعاون فراہم کرنے کے لیے تیار ہے، جس میں طبی سہولیات، امدادی سامان اور ہنگامی عملہ شامل ہے اور اس سلسلے میں وفاقی حکومت اور دیگر صوبوں سے قریبی رابطے میں ہے۔
علی امین گنڈاپور نے اپنے بیان میں کہا کہ یہ وقت قومی اتحاد اور یکجہتی کا ہے، اور خیبر پختونخوا کے عوام اپنی مادرِ وطن کے دفاع کے لیے ہر سطح پر پرعزم اور ہمہ وقت تیار ہیں۔
