ملک بھر میں انٹرنیٹ بند نہیں کیا جائے گا، وزیر آئی ٹی شزا فاطمہ

وفاقی وزیر مملکت انفارمیشن ٹیکنالوجی (آئی ٹی) شزا فاطمہ نے کہا ہے کہ بھارت نے مقبوضہ کشمیر میں انٹرنیٹ سروسز بند کر رکھی ہیں لیکن پاکستان میں انٹرنیٹ سروسز بند نہیں کی جائیں گی۔

وی نیوز کے ساتھ خصوصی گفتگو کرتے ہوئے ان کا کہنا تھا کہ ہمارے تمام سائیبر سیکیورٹی ادارے الرٹ تھے اور ہماری سائیبر اسپیس محفوظ ہے۔ جس طرح پاک فضائیہ نے بھارتی جارحیت کا جواب دیا ہے، اسی طرح ہمارے دیگر ادارے بھی الرٹ تھے۔

https://Twitter.com/WENewsPk/status/1920018376073560189

مزید پڑھیں: پاک فضائیہ کا بھرپور جواب: 3 رافیل سمیت بھارت کے 5 جنگی طیارے اور ڈرون مار گرائے، آئی ایس پی آر

انہوں نے کہا کہ ہمارے ٹیلکام اور انٹرنیٹ کے تمام رابطے بحال اور قائم ہیں۔ پاک فضائیہ کی بھرپور جوابی کارروائی نے عوام کا جذبہ بلند کیا ہے، اور سوشل میڈیا پر بھی عوام نے بھرپور مقابلہ کیا ہے۔

شزا فاطمہ نے کہا کہ بھارت نے جو ہمارے سوشل میڈیا اکاؤنٹس بند کروائے تو ہماری میٹا اور فیس بک حکام سے بھی بات ہوئی۔ پھر ہم نے جوابی کارروائی میں ان کے گھر میں گھس کر یوٹیوب پر قومی ترانے چلائے اور پاکستانی افواج کو ان کے گھر گھر میں دکھایا۔ یوں ہم بیانیے کی جنگ بھی جیت چکے ہیں۔