سینئر صحافی انصار عباسی نے کہا کہ گزشتہ چند روز سے جو پاک بھارت کشیدگی جاری تھی وہ صرف پاکستان اور بھارت کے درمیان جنگ نہیں بلکہ اسلام اور کفر کے درمیان جنگ تھی جس میں نہ صرف پاکستان بلکہ تمام اسلامی دنیا کو فتح ہوئی ہے۔ یہ جنگ صرف بھارتی وزیر اعظم نریندر مودی کے ساتھ نہیں تھی بلکہ بھارت میں جو اسلام مخالف سوچ ہے، ان کے ساتھ بھی تھی۔
وی نیوز سے خصوصی گفتگو کرتے ہوئے انصار عباسی نے کہا کہ جس وقت بھارت نے پاکستان کے نور خان ایئر بیس سمیت دیگر بیسز پر حملہ کیا تو آرمی چیف جنرل عاصم منیر اور اعلیٰ حکومتی قیادت کے درمیان ملاقات ہوئی جس میں بھارت پر جوابی حملوں کا فیصلہ کیا گیا۔ اس موقع پر جنرل عاصم منیر نے بہت لمبی دعا کرائی اور قرآن و سنت کے حوالے سے گفتگو کی اور بتایا کہ مسلمان جس وقت جنگ شروع کرتے ہیں تو وہ ان طریقوں کے تحت جنگ کا آغاز کرتے ہیں۔ ہم بھی اسی طرح آغاز کریں گے۔ اس کے علاوہ انہوں نے قرآن مجید کی ایک آیت میں سے ’بنیان مرصوص‘ آپریشن کے نام کا انتخاب کیا۔ اسی میٹنگ میں فیصلہ کیا گیا کہ بھارت کے خلاف آپریشن ہوگا۔ اس کا آغاز سنت کے مطابق نماز فجر کے وقت کیا جائے گا۔ آپریشن کے دوران جو جو قدم اٹھائے گئے وہ قرآن و سنت کے مطابق اٹھائے گئے۔
انصار عباسی نے کہا کہ پاکستان کی جانب سے جو بھی میزائل فائر کیے گئے ہیں ان کو فائر کرنے سے پہلے اللہ اکبر اور الحمدللہ کے نعرے لگائے گئے۔ آرمی چیف نے نماز فجر باجماعت پڑھی اور خود امامت کی، جس کے بعد ایک مرتبہ پھر سے دعا کی گئی۔ پاکستان کی تینوں افواج نیوی، آرمی اور ایئر فورس نے جنگ کے حوالے سے جو بھی اقدام اٹھائے وہ اسلامی تعلیمات کی بنیاد پر اٹھائے۔
سینئر صحافی انصار عباسی نے کہا کہ اگر دیکھا جائے تو انڈیا ایک بہت بڑا ملک ہے، اس کے پاس پیسہ بھی بہت ہے اور اسلحہ بھی پاکستان سے کئی گنا زیادہ ہے اور اس کے علاوہ بھی انتہائی غیر معمولی وسائل تھے لیکن پاکستان نے جب حملہ کیا تو 5 گھنٹوں میں انڈیا کو شکست دے دی۔
انصار عباسی نے کہا کہ میرا ایمان ہے کہ بھارتی حملے کی منصوبہ بندی اور جو کارروائی کی گئی اس میں اس بات کو سر فہرست رکھا گیا کہ جو کچھ بھی کیا جائے، وہ اسلامی تعلیمات کے عین مطابق کیا جائے اور یہ میرا ایمان ہے کہ اگر کوئی چیز اس اسلامک تعلیمات کے عین مطابق کی جائے تو اللہ کی مدد حاصل ہوگی۔ بھارت کا تکیہ وسائل پر تھا جبکہ ہمارا تکیہ اپنے اللہ کے اوپر تھا۔ بھارت نے فرانس کا سب سے بہترین طیارہ رافیل لیا، اسرائیل سے ڈرون لیے لیکن ان کی یہ سب چیزیں کام نہیں کر سکیں۔
انصار عباسی نے کہا کہ یہ جیت پاکستان کی نہیں اسلام اور اسلامی دنیا کی جیت ہے۔ اس جیت پر ہمیں اللہ کا شکر ادا کرنا چاہیے اور اس انداز میں شکریہ ادا کرنا چاہیے جو اللہ اور اللہ کے رسول ﷺ نے بتایا ہے۔ اور ہمیں اس جیت پر تکبر نہیں کرنا چاہیے۔
