گزشتہ چند روز سے ایک خبر کافی زیادہ گردش کررہی ہے، جس میں دعویٰ کیا گیا ہے کہ انڈیا پاکستان جنگ کے دوران پاکستان کے حوالے یوٹیوب پر منفی مواد پوسٹ کرنے کی وجہ سے کچھ یوٹیوبرز کے اکاؤنٹ بلاک ہونے جا رہے ہیں۔
اس خبر کے سامنے آنے کے بعد بعد نہ صرف یوٹیوبرز بلکہ عوام میں بھی تشویش پائی جا رہی تھی کہ وہ کون سے یوٹیوبرز ہیں جن کے اکاؤنٹس بلاک کیے جائیں گے۔
یہ بھی پڑھیں پاک بھارت جنگ کے دوران منفی پروپیگنڈا کرنے والے یوٹیوبرز کے اکاؤنٹس بلاک کرنے کا فیصلہ
اس حوالے سے جب پاکستان ٹیلی کمیونیکیشن اتھارٹی (پی ٹی اے) سے رابطہ کیا گیا، تو ترجمان پی ٹی اے زیب النسا کا کہنا تھا کہ پی ٹی اے کی جانب سے نجی ٹی وی چینل پر نشر ہونے والی اس خبر کی سختی سے تردید کی جاتی ہے جس میں دعویٰ کیا گیا ہے کہ پی ٹی اے نے ریاست مخالف مہم کے تناظر میں یوٹیوب چینلز کی بلاکنگ کے لیے کوئی فہرست تیار کی ہے یا وفاقی حکومت کو ایسی کوئی فہرست ارسال کی ہے۔
انہوں نے مزید بتایا کہ پی ٹی اے واضح کرتا ہے کہ ادارے کا مینڈیٹ صرف غیر قانونی آن لائن مواد کو ہٹانے یا بلاک کرنے تک محدود ہے۔ جیسا کہ ’پریوینشن آف الیکٹرانک کرائمز ایکٹ (PECA) 2016‘ اور اس سے متعلقہ قواعد و ضوابط میں درج ہے۔
ان کا کہنا تھا کہ ریاست مخالف یا نفرت انگیز مواد کے حوالے سے قانونی کارروائی، تفتیش اور عدالتی اقدامات متعلقہ قانون نافذ کرنے والے اداروں کی ذمہ داری ہے۔
یہ بھی پڑھیں وہ پاکستانی یوٹیوبرز جو شہرت سنبھال نہ پائے
زیب النسا کا یہ بھی کہنا تھا کہ میڈیا سے گزارش ہے کہ ایسے حساس موضوعات پر خبر نشر کرنے سے قبل تصدیق شدہ اور ذمہ دارانہ صحافتی اصولوں کو مدِنظر رکھا جائے تاکہ عوام میں غلط فہمی نہ پھیلے۔
